Rama, për SCAN: Në 2021, rritja ekonomike rreth 6%: “Vitin e ardhshëm, rritje të pagave të mjekëve me 40% dhe të arsimtarëve me 15%”
Ashtu si edhe të martën e kaluar, kryeministri Edi Rama ka mbajtur një konferencë për mediat, me fokus ekonominë. Interesit të televizionit Scan se sa do të jetë rritja ekonomike në 2021, kryeministri ju përgjigj duke thënë se parashikohet në 6 %, ndërsa ende nuk janë përcaktuar modalitetet për mënyrën e financimit të HEC-it të Skavicës.
“Për fat të mirë mund t’ju them që nga eksperienca e këtyre viteve parashikimet e bëra në kushte shtëpie, pra brenda qeverisë, për rritjen ekonomike janë ato që janë më afër realitetit dhe përgjithësisht unë besoj tek ky trend kështu që ne nuk kemi thënë najherë që do rritem i12%, nuk e di nga ka dalë kjo dhe mendoj se do të jemi rrotull 6% dhe plus. Përsa i përket Buxhetit, ai do të jetë publik në ditët ën vijim pasi ka marrë formë përfundimtare dhe javën e ardhshme kalon në qeveri pastaj në parlament.
Lidhur me Skavicën opsionet e financimit janë çështja me të cilën po merremi tani dhe kur ti kemi konkluzionet dhe opsionin final të financimit ju do të jeni të parët që do ta merrni vesh.
Kryeministri foli edhe për një masë të rëndësishme të qeverisë që lidhet me rritjen e pagave për mjekët dhe mësuesit. Rritja më e madhe shkon për mjekët në vlerën e 40% ndërsa për arsimtarët 15%.
“Janë dy kategori që meritojnë gjithmonë më shumë dhe që në këto kushte pavarësisht të gjithë shtrëngesave të krijuara në dy goditje të mëdha njëra pas tjetrës, tërmeti dhe COVID-I kemi detyrimin që t’ju japim sot një mbështetje të fortë për të shpërblyer mundin, profesionalizmin. Paga për bluzat e bardha do të rritet 40% dhe është padyshim rritja më e madhe historike e pagave për bluzat e bardha ndërsa për arsimtarët në nivelin 15%. ” – u shpreh kryeministri.
Në lidhje me lajmin se ka një rikthim të vizave me vendet e zonës shengen, kryeminstri tha se nuk ka kthim pas por është thjesht një procedurë për të verifikuar shtetasit që hyjnë në BE, nëse kanë rekorde kriminale.
Arbër Hitaj / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.