Rekord i ri infektimesh në vend, 2 persona ndërrojnë jetë. Numri i të shëruarve vijon me ritme të larta

Kjo e martë ka shënuar numrin më të lartë të pacientëve të dyshuar me COVID- 19 që janë testuar, ku kanë rezultuar pozitiv 155 persona. 932 teste janë kryer në total gjatë 24 orëve të fundit, shifra më e lartë e regjistruar që nga fillimi i pandemisë në vendin tonë.

“Gjatë 24 orëve të fundit në vendin tonë janë kryer 932 testime për vlerësimin e infektimit nga virusi SARS COV2, dhe 155 persona janë konfirmuar pozitivë me COVID-19”, njofton Ministria e Shëndetësisë.

Fatkeqësisht gjatë ditës së sotme, 2 qytetarë kanë humbur betejën me këtë virus, duke e çuar në total numrin e viktimave në vendin tonë në 232. Tirana është qarku më i prekur, për t’u ndjekur nga Shkodra dhe Durrësi.

Një lajm i mirë është se ka rënë ndjeshëm numri i pacientëve të shtruar në dy spitalet COVID-19, por optimiste është edhe shifra e të shëruarve gjatë 24 orëve. Aktualisht në spitalin Infektiv dhe “Shefqet Ndroqi” po trajtohen 95 pacientë, 22 më pak se dje, nga të cilët 12 në terapi intensive nga të cilët 4 pacientë janë të intubuar. Sa i përket të shëruarve, 55 qytetarë, 33 më shumë se dje,  kanë dalë fitimtarë në këtë betejë me koronavirusin.

“Aktualisht në spitalin Infektiv dhe “Shefqet Ndroqi” po trajtohen 95 pacientë të konfirmuar pozitivë me COVID-19, 12 në terapi intensive nga të cilët 4 pacientë janë të intubuar. Në 24 orët e fundit janë shëruar 55 qytetarë, duke e çuar numrin e të shëruarve në 3871 , që nga fillimi i epidemisë”, njofton Ministria e Shëndetësisë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.