Roboti njerëzor Jia Jia “fillon punë” si gazetare për agjencinë kineze Xinhua

Automatizimi është një e ardhme e pashmangshme për shumë profesione, të cilat do të kryhen nga programet kompjuterike ose robotët. Edhe gazetaria duket se nuk bën përjashtim.

Agjencia kineze e lajmeve Xinhua ka postuar një video ku tregon robotin e saj të parë interaktiv, Jia Jia, e cila është duke marrë në intervistë redaktorin themelues të revistës Wired. Agjencia shtetërore e shfaqi live të gjithë seancën, duke e quajtur si një bisedë me “reporteren” e veçantë. Megjithatë, ajo pati shumë probleme gjatë “intervistës”, e cila u zhvillua më shumë nga redaktori, kryesisht për shkak të gjuhës, pasi Jia Jia është konceptuar në gjuhën kineze.

Roboti është ndërtuar nga një ekip inxhinierësh pranë Universitetit të Shkencave dhe Teknologjisë në Kinë.

Jia Jia mund të kuptojë shumë mirë dialogun dhe ofron shprehi të vogla në fytyrë, të ndjekura nga lëvizje trupore. Megjithatë ajo mbetet eksperiencës të sofistikuar të humanoidëve që kinematografia ka shfaqur në filma si ‘Blade Runner’, ‘Ex Machina’ apo në seriale si ‘Westworld’.

Shprehitë e saj janë minimale, duke e bërë të ngjajë më shumë si manekin se sa si një njeri i vërtetë, sidomos nga afër. Jia Jia mund t’u përgjigjet vetë pyetjeve si ‘Kush je?’ dhe ‘Sa vjeç je?’, dhe përgjigjet duke buzëqeshur e mbyllur sytë kur dikush e përshëndet.

Krijuesi i saj parashikon se brenda një dekade, robotë me inteligjencë artificiale si Jia Jia do të kryejnë një sërë aktivitetesh të thjeshta në restorante, spitale, azile dhe shtëpi.

Edhe në këtë stad zhvillimi, ky robot mund të japë të dhëna shumë të dobishme si parashikimi i motit, përmes lidhjes me internetin. Jia Jia lëviz vetë dhe është dizajnuar për të njohur ndërveprimet me njerëzit dhe makineritë.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.