Rritet kredia për sipërmarrjet e vogla dhe të mesme – Bankat raportojnë lehtësim për biznesin dhe individët

Bankat lehtësuan më tej standardet e kreditimit në tremujorin e fundit të vitit të kaluar, duke konfirmuar një tendencë pozitive të ofertës për kredi në ekonominë shqiptare. Mbështetur në rezultatet e vrojtimit të aktivitetit kreditues, bankat raportuan një lehtësim standardesh në huadhënie, si për bizneset, ashtu edhe për individët.

Në segmentin e biznesit, lehtësimi erdhi sidomos në kriteret e kreditimit të ndërmarrjeve të vogla dhe të mesme. Bankat u shprehën se kjo u ndikua sidomos nga konkurrenca në rritje brenda sistemit bankar, por edhe nga gjendja e favorshme e treguesve të kapitalizimit dhe likuiditetit.

Në segmentin e individëve, bankat raportojnë një lehtësim të standardeve të huadhënies për kredinë për blerjen e pasurive të paluajtshme. Edhe në këtë produkt bankat vlerësojnë se konkurrenca në rritje ka dhënë një ndikim pozitiv, së bashku me një gatishmëri për të marrë përsipër më shumë rrezik.

Por, nga ana tjetër, bankat kanë konstatuar një rënie të kërkesës për kredi gjatë tremujorit të fundit 2019, si tek bizneset, ashtu edhe tek individët. Kjo ndoshta reflekton gjendjen e krijuar pas tërmetit të nëntorit. Trauma e tërmetit shkaktoi një lloj ngërçi në aktivitetin ekonomik, duke ndikuar shumë edhe psikologjikisht pritshmëritë e familjeve dhe të bizneseve.

Sidoqoftë, bankat presin që kjo gjendje të tejkalohet qysh në tremujorin e parë të këtij viti. Pritshmëritë e tyre janë për rritje të kërkesës për kredi, si nga bizneset, ashtu edhe nga individët. Ndërkohë, pritet që oferta e sistemit bankar t’i përgjigjet edhe më mirë kësaj kërkese të pritshme në rritje. Bankat parashikojnë që standardet e kreditimit të lehtësohen në tremujorin e parë të vitit në të gjitha segmentet e tregut.

Perceptimet pozitive të shprehura nga bankat në vrojtimet e fundit të aktivitetit kreditues përgjithësisht gjejnë mbështetje edhe në statistikat për ecurinë e kreditimit të ekonomisë. Sipas Bankës së Shqipërisë, në fund të nëntorit 2019, portofoli i kredisë për ekonominë arriti vlerën e 568 miliardë lekëve ose rreth 4.6 miliardë eurove. Rritja vjetore e kredisë, e zhveshur nga efekti i fshirjeve dhe i kursit të këmbimit, ka arritur në rreth 8%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.