Rritja e transportit ajror në Shqipëri eklipsohet nga aeroportet rajonale – Më mirë vetëm se Serbia
Numri i pasagjerëve që udhëtojnë me linja ajrore në Shqipëri është gjithmonë e më i lartë, një fakt që përforcohet nga shifrat e raportuara në rritje muaj pas muaji. Vitin e kaluar rreth 2.63 milionë shqiptarë e të huaj kaluan përmes aeroportit të Rinasit, i cili njohu një rritje prej 19,8% në fluksin e pasagjerëve.
Ecuria pozitive ka ndjekur edhe në muajt e parë të këtij viti, ku TIA ka regjistruar një rritje me 11.7% në Janar dhe 10.1% gjatë Shkurtit. Megjithatë, shifrat edhe më mbresëlënëse të aeroporteve në Europën Juglindore dhe rajonin e Ballkanit në veçanti e kanë eklipsuar performancën e Shqipërisë.
Në fakt, ylli në rajon është Bosnja dhe Hercegovina, 4 aeroportet e së cilës kanë regjistruar një rritje pasagjerësh prej 22% gjatë dy muajve të para të vitit.
Në Ballkan shkëlqen gjithashtu aeroporti “Aleksandri i Madh” në Shkup, i cili gjatë Janarit dhe Shkurtit ka regjistruar rritje në numrin e pasagjerëve me përkatësisht 18.3% dhe 21.8%.
Një performancë më të mirë se Shqipëria ka arritur edhe Mali i Zi, ku dy aeroportet ndërkombëtare kanë regjistruar një rritje të përbashkët të trafikut me 19.5%. Disi më të ulëta janë edhe shifrat që vijnë nga aeroporti i Prishtinës, i cili deri më tani ka rritur volumin e udhëtarëve me 15.8%.
Megjithatë, një shifër që vlen për t’u përmendur është fakti se aeroporti “Nënë Tereza” frekuentohet nga një numër më i lartë udhëtarësh, çka do të thotë se rritja në terma numerikë është më e lartë, por kur përkthehen në përqindje rezultojnë në një shifër më të ulët.
I tillë është shembulli i aeroportit “Nikola Tesla” në Beograd, i cili ka pritur 631 mijë pasagjerë gjatë dy muajve të parë të vitit, por ka regjistruar një rritje me vetëm 3.1%. Në total, transporti ajror në Serbi është rritur me 4.9%, çka e bën shtetin e vetëm në rajon që ka një performancë më të dobët se Shqipëria.
Rritja më e dobët e këtij segmenti të transportit në Shqipëri mund të shpjegohet edhe me rritjen minimale në numrin e fluturimeve dhe prezantimin e linjave dhe destinacioneve të reja. Për ta konkretizuar, nëse nga Rinasi numri i fluturimeve u rrit me vetëm 7.4% gjatë këtij viti, Sarajeva regjistroi një rritje me 19.7%, Shkupi një rritje me 18.7% dhe Podgorica e Prishtina një rritje të ngjashme me 11.3%.
Shqipëria performon më dobët në rajon edhe sa i takon treguesit të transportit të mallrave me rrugë ajrore.
Angelo Haruni/SCAN
Air Albania nis procesin e rekrutimit për të rinjtë – Rama: Së shpejti do të ngrejë avionët
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.