Shërbimi më i ri nga DPSHTRR/ Targat e serive të veçanta dhe ato Suvenir – Sa janë tarifat dhe si të aplikoni?

Drejtoria e Përgjithshme e Shërbimeve dhe Transportit Rrugor ka njoftuar se për herë të parë ka sjellë sistemin e rezervimit online për targat e serive të veçanta, në kuadër të luftës kundër informalitetit.

DPSHTRR tha se ky shërbim është klasifikuar në dy drejtime:
1. Për automjetet ofrohen dy kategori të ndryshme targash të veçanta: Kategoria e Parë përfshin të gjitha targat, tre numëroret e të cilave janë të njëjtë, pavarësisht nga çifti i shkronjave para dhe pas tyre, si edhe dy tre numërorët 001 dhe 007 që kanë kërkesa më të larta.  Tipi : “111, 222, 999 dhe 001, 007”. Tarifa është 30,000 Lekë plus tarifat standarde të shërbimit të regjistrimit të automjetit.

Gjithashtu, përfshihen të gjitha targat, tre numëroret e të cilave fillojnë ose mbarojnë me dy (2) zero, ose dy numrat anësorë janë njësoj dhe zero në mes, pavarësisht nga çifti i shkronjave para dhe pas tyre (përveç 001 dhe 007). Tipi: “002, 006, 009, 900, 600, 200, 101, 707, 606”. Tarifa është 20,000 Lekë plus tarifat standarde të shërbimit të regjistrimit të automjetit.

2. Për moto mjetet ofrohet një kategori e veçantë: Kategoria e vetme përfshin të gjitha targat, tre numërorët e të cilave janë të njëjtë, pavarësisht nga çifti i shkronjave para dhe pas tyre. Tipi : “111, 222, 999”. Tarifa është 10,000 Lekë plus tarifat standarde të shërbimit të regjistrimit të moto mjetit.

Sipas DPSHTRR, për të gjitha kategoritë, përveç vlerës së shërbimit, do të aplikohet edhe vlera prej 7,700 Lekë që përfshin tarifat standarde për pajisjen me targë/regjistrim mjeti pranë DRSHTRR-ve për automjetet; ndërsa kjo vlerë për moto mjetet është 6,700 Lekë.
Sipas njoftimit, për automjetet nuk përfshihen tarifa RBS, Kalim Pronësie ose ndryshim formati targe nga drejtkëndëshe në katrore.
Të gjithë aplikantët e këtij shërbimi do të kenë prioritet në kryerjen e procedurave, pa pritur në radhë.

DPSHTRR tha se të gjithë qytetarët/subjektet duhet të kryejnë regjistrimin online nëpërmjet këtij sistemi, (http://rezervim.dpshtrr.gov.al/#/booking) duke paraqitur të dhënat e kërkuara të mjetit dhe ato personale/të subjektit të sakta, sipas kartës së tyre të identitetit/niptit të aktivitetit.
Sipas njoftimit aplikuesit duhet të bëjnë kujdes në momentin e marrjes së shërbimit pranë DRSHTRR-ve, pasi duhet të jetë ose zotëruesi i mjetit ose person i autorizuar nga subjekti biznes, enti leasing, koncesionar, agjenci shërbimesh.

DPSHTRR tha se rezervon të drejtën të pezullojë rezervime që kryhen nga persona që dyshohet se luajnë rolin e sekserëve ose që shtojnë tarifa të paautorizuara mbi këtë shërbim publik, si edhe ndalon aksesin në sistem përgjithmonë për keqpërdorim të shërbimit. Në çdo rast kur një rezervim nuk rezulton në kryerjen e shërbimit për mosparaqitjen e qytetarit/subjektit brenda afatit, targa rikthehet automatikisht në sistem për t’u rishitur përmes rezervimeve të reja.

Gjithashtu, pas plotësimit me sukses të aplikimit online, qytetari/subjekti ka një dritare kohore me afat të kufizuar, që do i informohet me email, me detajet e komunikimit për paraqitjen pranë sportelit të zgjedhur të drejtorisë rajonale për të kryer pagesën e shërbimit dhe targimin e mjetit.
DPSHTRR njofton aplikuesit të kenë kujdes për afatin kohor pasi mosparaqitja brenda afatit të përcaktuar për maksimumin e 10 rezervimeve do të konsiderohet keqpërdorim i këtij shërbimi publik dhe do të rezultojë në një mohim të aksesit në vijim për aplikuesin.

TARGAT SUVENIR ONLINE

Një nga shërbimet më të reja nga DPSHTRR janë Targat SUVENIR për dedikime, personalizime, showroom, zyrë a shtëpi të cilat tashmë mund të porositen online. DPSHTRR njofton të interesuarit të porosisin duke aplikuar te: https://www.retro.al/targe-suvenir

Ky shërbim i ofron individëve mundësinë e personalizimin të targës duke zgjedhur formën dhe ngjyrën e preferuar. Sipas njoftimit , tarifa për Targën Suvenir është 1500 Lekë të reja.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.