Shpallet tenderi, FSHZH: 37.6 milionë lekë për projektin e zonës turistike të Golemit

Fondi Shqiptar i Zhvillimit ka shpallur tenderin në Agjencinë e Prokurimit Publik për studim – projektimin e zonës turistike të Golemit. Fondi i vënë në dispozicion për këtë projekt, i cili do të vihet në zbatim të zhvillimit të kësaj zonë turstike, është 37.6 milionë lekë.

“Objektivi kryesor i projektit është përmirësimi i aksesit drejt potencialeve turistike të zonës, me qëllim zhvillimin e turizmit, rritja e cilësisë së jetës për komunitetin dhe pushuesit, rritja e mundësive për zhvillimin ekonomik të qëndrueshëm të zonës turistike, përmirësimi dhe siguria e lëvizjes së mjeteve dhe njerëzve brenda zonës turistike, përmirësimi dhe lehtësimi i qarkullimit të mjeteve të transportit nga zona turistike në drejtim të Kavajës, të Durrësit dhe të Tiranës, duke krijuar mundësi më të mirë për qarkullimin e tyre dhe duke reduktuar dukshëm trafikun në rrugën dytësore Rrethrrotullimi Plepa-Rrethrrotullimi Mali i Robit” specifikohet në detajet e tenderit.

Ndërhyrjet e propozuara në tenderin e projektit janë ndërtimi i shtresave rrugore të segmenteve të lartpërmendura, sistemimi i shesheve dhe mobilimi urban., ndërtimi i trotuareve, shëtitores, parkimeve, kanalet e ujërave të zeza, drenazhi i rrugës, veprat e artit, masat mbrojtëse, punimet elektrike, ndriçimi, fibra, sinjalistika vertikale dhe horizontale, etj.

Për aplikantët e interesuar, tenderi do të qëndrojë i hapur në Agjencinë e Prokurimit Publik deri më 10 prill, ora 11:00.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.