Shqipëria do të riorganizojë transportin publik DPSHTRR: Sistem i ri biletimi, rishikim rrjetit të linjave e standardeve të autobusëve

Drejtoria e Përgjithshme e Shërbimeve të Transportit Rrugor ka kërkuar riorganizimin e sektorit të transportit publik të udhëtarëve.  Me qëllim rritjen e standardeve dhe sigurisë në këtë sektor, ky dikaster ka propozuar pranë Ministrisë së Infrastrukturës dhe Energjisë marrjen e disa masave për rikonceptimin dhe riorganizimin e sektorit, të ndarë në 2 faza.

Faza e parë do të përfshijë krijimin e platformës elektronike e-Transport, marrjen e masave për funksionimin e terminaleve në përputhje me aktet ligjore dhe rikonceptimin e sistemit të biletimit nëpërmjet agjencisë së biletave. Ndërkohë që, faza e dytë do të jetë hartimi i rrjetit të ri të linjave dhe vendosja e kritereve për rinovimin e flotës së mjeteve, me qëllim përdorimin e mjeteve të standardeve evropiane.

Ndryshime të sistemit të biletimit janë kërkuar edhe nga eskpertët e sektorit, të cilët kanë propozuar instalimin e sistemeve elektronike të biletave, që mundësojë lidhjen e drejtpërdrejtë me sistemin e tatimeve, duke parandaluar edhe rastet e abuzimit, që nuk kanë munguar. Gjatë vitit 2019, Policia e Shtetit ndaloi tetë persona, mes tyre 4 administratorë e ortakë të disa shoqërive operatore në transportin urban në qarkun, nën dyshimin se “kishin falsifikuar qindra mijëra bileta urbani, duke krijuar përfitime të paligjshme e shmangur detyrimet tatimore”. Ndërkaq, propozimi I DPSHTRR-së është në fazë miratimin nga Ministria e Infrastrukturës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.