Shqiptarët, në majën e piramidës së shtetësive europiane! Eurostat: I lënë pas vetëm marokenët

Shqiptarët janë të dytët në listën e “trinomit” që ka fituar shtetësinë e një vendi të Bashkimit Europian për vitin 2019. Këto të dhëna dalin nga raporti më i fundit i Eurostat, në të cilin rezulton se nga 41.700 në total, dominanca e shtetësive të fituara janë italiane. Konkretisht, 62%.

Ndërkaq, Maroku është i pari në listë, me 66.800 persona, prej të cilëve 84% fituan shtetësinë spanjolle, italiane, apo franceze.

Në vend të tretë, sipas të dhënave të Eurostat, rezultojnë britanikët, me një total prej 29.800 personash. Nga ky total, 75% fituan shtetësinë gjermane, suedeze apo franceze.

Ndër të tjera, Eurostat flet për një shifër në rritje të personave që fituan shtetësinë e një vendi të Bashkimit Europian, krahasuar me vitin paraardhës. Sipas të dhënave, në total ishin 706.400 persona që morën shtetësi nga BE në vitin 2019, nga 672.300 persona, në vitin 2018.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.