Shqiptarët sigurojnë pronat, “harrojnë” shëndetin – AMF: U rritën 3.98% kontratat për zjarrin e katastrofat, ranë 11.2% kontratat shëndetësore
Tërmeti i 26 nëntorit 2019 e më tej Pandemia Covid-19 kanë ndryshuar dukshëm konfigurimin e tregut të sigurimeve për vitin e shkuar. Shqiptarët kanë vrapuar të sigurojnë pronat nga zjarri e fatkeqësitë natyrore, duke lënë pas dore sigurimin e aksidenteve e shëndetit, ndërkohë që tregu në total ka shënuar një tkurrje të ndjeshme përgjatë gjithë vitit 2020.
Sipas të dhënave të sapo publikuara nga Autoriteti i Mbikëqyrjes Financiare, ka një rritje të numrit të kontratave në segmentin zjarri dhe forcat e natyrës, megjithëse volume total i arkëtimeve ka rënë.
Në portofolin sigurimi nga Zjarri dhe Forcat e Natyrës, gjatë vitit 2020, vihet re një ulje prej 5.08% e volumit të primeve të shkruara bruto të këtij portofoli dhe një rritje me 3.98% e numrit të kontratave të sigurimit, krahasuar vitin 2019, raporton Autoriteti i Mbikëqyrjes Financiare.
Ndërkaq Të ardhurat nga sigurimet e Aksidenteve dhe Shëndetit, gjatë vitit 2020, arritën në rreth 1 miliardë lekë, duke shënuar një ulje prej 11.20% në krahasim me vitin 2019.
Sa i përket tregut në tërësi, Të ardhurat nga primet e shkruara bruto të sigurimit për vitin 2020 kapën vlerën mbi 16,6 miliardë lekë (afërsisht 160 milionë dollarë), ose 5.73% më pak se viti 2019. Gjatë vitit 2020, numri i kontratave të sigurimit të lidhura arriti në 956,447 me një ulje prej 29.16% krahasuar me vitin 2019.
Tregu vazhdoi të mbetet sërish i orientuar tek sigurimet e Jo-Jetës, të cilat sollën 92.93% të vëllimit të përgjithshëm të primeve, duke i lënë përkatësisht sigurimet e Jetës me 7.02%.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.