Shtëpia e Bardhë kundërshton OBSH: “SHBA nuk do pengohet nga Organizata për të nxjerrë në treg vaksinën”

Shtëpia e Bardhë hodhi poshtë shqetësimet e Organizatës Botërore të Shëndetësisë, pasi zyrtarët amerikanë bënë të ditur se vaksina e koronavirusit mund të miratohet pa përfunduar të gjithë provat.  E përditshmja Washington Post raportoi se administrata e presidentit Donald Trump nuk do t’i bashkohet iniciativës botërore për të zhvilluar, prodhuar dhe shpërndarë vaksinën, për shkak të përfshirjes së OBSH. Rreth 172 vende janë angazhuar me planin e Organizatës për të siguruar akses tek vaksina.

“Shtetet e Bashkuara do angazhohen me partnerë ndërkombëtarë për të mposhtur virusin, por nuk do kufizohen nga ente të korruptuara si  OBSH dhe Kina”,- tha zëdhënësi i Shtëpisë së Bardhë, Judd Deere. Ai shtoi se presidenti do sigurojë se çdo vaksinë e re do ruajë standardet e Administratës së Barnave dhe Ushqimeve, do testohet gjerësisht dhe do shpëtojë jetë.  Deri më tani nuk ka një vaksinë të miratuar të koronavirusit, përveç asaj të autorizuar nga Rusia përpara testimeve në masë.

Administrata e Barnave dhe Ushqimeve në SHBA ka deklaruar më parë se është përgatitur të autorizojë një vaksinë të koronavirusit përpara se të përfundojnë provat klinike të fazës përfundimtare, nëse zyrtarët janë të bindur se përfitimet tejkalojnë rrezikun. Në nisje të Javës, Organizata Botërore e Shëndetësisë deklaroi se nxitimi për të nxjerrë në treg një vaksinë, mund të sjellë rreziqe.  Drejtori i programit të emergjencave i OBSH, Mike Ryan, ka thënë se vaksinimi i miliona njerëzve më shpejtë se ç’duhet, mund të ketë efekte anësore të pastudiuara.  Trump ka kritikuar trajtimin e pandemisë nga Organizata, duke e akuzuar për mbrojtjen e Kinës dhe dhënien e këshillave të këqija.  Në Maj, Trump lajmëroi se SHBA do ndërpresë marrëdhëniet me organizatën.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.