Sigurimet 2021, shqiptarët paguan 200 milion dollarë – Lehtësimi i kufizimeve rriti me 16% tregun, 110 milionë dollarë vetëm për makinat

Autoriteti i Mbikëqyrjes Financiare ka bërë bilancin e tregut të sigurimeve për vitin që sapo lamë pas, duke evidentuar një rritje prej 16% të volumit të arkëtimeve. Kompanitë kanë arkëtuar në total rreth mbi 190 milionë dollarë, pjesa dërrmuese e të cilave I takon tregut të automjeteve

Tregu i sigurimeve për vitin 2021 ka njohur rritje të fortë krahasuar me vitin pararendës, duke arkëtuar në total një shifër që i afrohet 200 milionë dollarëve. Autoriteti i Mbikëqyrjes Financiare ka bërë bilancin e këtij tregu për vitin që sapo lamë pas, duke evidentuar një rritje prej 16% të volumit të arkëtimeve.

Sipas raportit të AMF, të ardhurat nga primet e shkruara bruto të sigurimit për vitin 2021 kapën vlerën 19,2 miliardë lekë, afërisht 192 milionë dollarë. Gjatë vitit 2021, numri i kontratave të sigurimit të lidhura arriti në 1,173,520 me një rritje prej 22.7% krahasuar me një vit më parë.

Gjithsesi, pavarësisht ngjarjeve të dy viteve të fundit, të shënuara nga tërmetet e pandemia Covid 19, tregu mbeti i orientuar tek sigurimet e Jo-Jetës, të cilat sollën 92.44% të vëllimit të përgjithshëm të primeve, ndërsa sigurimet e Jetës kanë 7.42%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zunë 38.35% dhe primet e shkruara bruto të sigurimit të detyrueshëm zunë 61.65% të totalit të tregut.

Ndërkohë që tregues në rënie ka shënuar totali i dëmshpërblimeve të paguara nga kompanitë në favor të qytetarëve e bizneseve. Kjo për shkak të bazës shumë të lartë krahasuese që solli viti 2020 në këtë zë, duke parë dëmshpërblimet e paguara për dëmet e shkaktuara nga tërmeti I 26 nëntorit të vitit 2019.

Gjatë vitit 2021, dëmet e paguara bruto në tregun e sigurimeve, arritën në rreth 6,6 miliardë lekë, ose 11.08% më pak se në vitin 2020, raporton Autoriteti I Mbikqyrjes Financiare.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.