Të bësh biznes në kohë krize – Konsumi dhe të ardhurat bien deri në 25%, turistët e huaj anulojnë prenotimet

Kriza e rëndë politike dhe protestat masive që kanë përfshirë vendin janë pa diskutim të dëmshme për ekonominë e vendit në tërësi.

Disa sektorë e ndjejnë drejtpërdrejtë situatën. I ftuar në “Argument”, Pedagogu i Fakultetit të Ekonomisë në Universitetin e Tiranës (FEUT), Rezart Prifti, njëherësh edhe sipërmarrës i vogël, u shpreh në studion e “Argument” të Hënën në mbrëmje se, krahasuar me të njëjtën periudhë të një viti më parë, xhiro e biznesit është në rënie drastike.

Madje, edhe në tregun e birrës është vënë re një rënie e ndjeshme e konsumit, sipas Stefan Pingulit, sipërmarrës dhe njëherësh pjesë e shoqatës së prodhuesve të birrës.

Turizmi ndërkohë është një sektor që preket drejtpërdrejtë nga dëmtimi i imazhit të vendit dhe destabiliteti. Sipas ekspertit të turizmit, nga shoqata shqiptare e turoperatorëve dhe agjencive turistike, Kliton Gërxhani, i ftuar në “Argument”, ka sinjale të qarta ngadalësimi, pasi prej muajsh janë vënë re anulime prenotimesh.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.