Të dhënat e konsumatorëve të Apple në Kinë u shitën ilegalisht

Policia kineze një javë më parë tha se kishte arrestuar 22 persona që dyshoheshin  se kishin shitur të dhënat personale të një numri të papërcaktuar të konsumatorëve të Apple.

Shumë nga detajet ishin të paqarta, duke përfshirë edhe identitetin e atyre që ishin përfshirë dhe ashpërsinë e shkeljes. Por diçka ishte e qartë hajdutët kishin korrur rreth 7.3 milionë dollarë gjatë një periudhe të paspecifikuar.

Në një deklaratë policia e Cangnan tha se kishte gjetur punonjës të Apple që kishin marrë të dhëna personale të konsumatorëve në mënyrë të paligjshme dhe më vonë deklaroi se 20 nga 22 njerëz punon për kompanitë që shesin produktet e Apple ose që janë nënkontraktorë të Apple.

Në Kinë produktet e Apple janë shitur gjerësisht në rrjete dyqanesh elektronike si dhe në qendra tregtare, përveç dyqaneve zyrtare te Apple.

Policia tha gjithashtu se këto të dhëna përfshinin emra, numra identifikimi si dhe numra të telefonave të përdoruesve të Apple.

Por nuk thanë asgjë për sa i përket fjalëkalimeve apo informatave të tjera financiare si psh numrat e kartave të kreditit, gjë e cila do të tregonte se hajdutët kanë qasje në të dhënat e brendshme të Apple dhe në këtë formë shkelja do të bëhej më serioze.

Arrestimet janë pjesë e një sërë vështirësish në Kinë për Apple. Shitjet e iPhone në Kinë janë ngadalësuar. Sipas analistëve, ndërkohë që konsumatorët presin për produktet e reja prodhuesit kinezë të telefonave më të lirë rrisin cilësinë dhe marketingun e tyre.

Apple gjithashtu është përballur me një shqyrtim të ri nga qeveria kineze pasi vitin e kaluar shërbimet e kompanisë për sa i përket filmave dhe librave u mbyllën në Kinë.

V.Hydi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.