Të papunët zanatçinj – Zënë 10% të nivelit të papunësisë

Në zyrat e punës aktualisht janë të regjistruar 83.5 mijë punëkërkues të papunë, ndërkohë që për shifrën e lartë të papunësisë, qeveria ia faturon “fajin” mungesës së aftësive profesionale të punëkërkuesve.

Por sa i përket strukturës së papunësisë, referuar shifrave të Shërbimi Kombëtar të Punësimit për vitin 2017, vihet re se 10 për qind të totalit të të papunëve të regjistruar e zënë individët që kanë mbaruar shkolla të mesme profesionale, pra rreth 8350 individë.

Një përqindje relativisht e lartë, duke qenë se qeveria po i orienton të rinjtë drejt këtij arsimi duke theksuar se kompanitë kërkojnë më së shumti zanatçinj.

Ndërsa ata që kanë mbaruar arsimin universitar zënë 5.8 për qind të totalit të papunësisë, kjo edhe për shkak se nuk regjistrohen pranë zyrave të punës, duke mos besuar në gjetjen e një vendi të mirë pune.

Shifrat e shërbimit Kombëtar të Punësimit, tregojnë se papunësia më e ulët e regjistruar i përket arsimit më pak se fillor dhe fillor, konkretisht me 2.9 për qind dhe 4.6 për qind, pikërisht për arsyen se kjo kategori të papunësh nuk regjistrohen në zyrat e punës edhe si rrjedhojë e mungesës së informacionit.

Ndërsa papunësinë me të lartë e zënë individët me arsim 9 vjeçar, 49.4 për qind, e ndjekur nga personat me arsim të mesëm të përgjithshëm në 27.2 për qind.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.