“Kura” e kredive me probleme – 10.7 mld lekë fshirje dhe 16.2 mld lekë ristrukturime në 2017

Vitin e kaluar sistemi bankar shqiptar fshiu rreth 10.7 miliardë lekë kredi të humbura. Sipas të dhënave nga Banka e Shqipërisë, nxjerrja jashtë bilancit e kredive të klasifikuara si të humbura prej më shumë se tre vjetësh vijoi në përmasa të konsiderueshme edhe vitin e kaluar, duke qenë një faktor i rëndësishëm në uljen e raportit të kredive me probleme.

Duke shtuar kreditë e fshira në vitet e mëparshme, për tre vitet e fundit kjo shifër prek vlerën e afro 48 miliardë lekëve ose rreth 370 milionë eurove.

Kjo shifër përfaqëson, në një masë të madhe, impaktin e goditjes së krizës në sistemin bankar shqiptar dhe, sidomos, humbjet në përmasa të mëdha në segmentin e korporatave.

Por, ajo që u vërejt gjatë vitit të kaluar është rritja e ristrukturimit të kredive, çka bëri që edhe kjo kategori të kishte një kontribut të rëndësishëm në uljen e raportit të kredive me probleme. Vitin e kaluar, bankat ristrukturuan 16.2 miliardë lekë kredi, megjithatë, jo të gjitha ishin kredi me probleme.

Vitin e kaluar, sistemi bankar arriti ta ulë raportin e kredive me probleme në 13.2%, në nivelin më të ulët prej shtatë vitesh. Edhe në vlerë, portofoli i kredive me probleme u ul ndjeshëm në rreth 80 miliardë lekë, 30% më pak krahasuar me fundin e vitit 2016.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.