Tenderët fitohen me fond limit – E konfirmon edhe APP: Në 2018-ën u kursye 6.45% e parave publike!
Tenderët publikë fitohen nga kompanitë me vlera afër fondit limit, ndërkohë që ky fakt konfirmohet edhe nga të dhënat zyrtare të Agjencisë së Prokurimit Publik.
Sipas raportit vjetor të këtij institucioni, fondi limit total i shpallur për vitin 2018 është rreth 130 miliard lekë, ndërkohë që fondi i kursyer është vetëm 6.45% e fondit të prokuruar. Shpallja e ofertave fituese që janë afër fondit limit të vënë në dispozicion është cilësuar nga ekspertët, por edhe nga Partia Demokratike si shenjë e manipulimit të garës dhe paracaktimit të fituesve, duke çuar edhe në shpërdorimin e parave të buxhetit të shtetit.
Ndërkaq, të dhënat e Agjencisë së Prokurimit Publik flasin edhe për numrin e operatorëve ekonomikë që marrin pjesë në një tender, si një tjetër tregues për zhvillimin e garave të drejta dhe me konkurrencë të ndershme. Më konkretisht për vitin 2018, mesatarja e numrit të ofertave në procedurat me vlerë mbi 800.000 lekë ka qenë 3.05 operatorë ekonomikë, ndërsa në procedurat e prokurimit me vlerë të vogël, kjo mesatare ka qenë 9.7. Krahasuar me vitin 2017, mesatarja e ofertave ka pësuar një rritje të vogël, nga 2.98 në 3.05.
Në total për vitin që kaloi u shpallën 8,400 tenderë apo 1083 më shumë në krahasim me një vit më parë. Gjithashtu, numri i procedurave për dhënien me koncesion apo partneritet publik privat, të shpallura në sistemin elektronik ishte 7, ku të gjithë janë finalizuar me shpalljen e fituesit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.