Tirana, 24 orë me ujë të pijshëm – UKT, Gjebrea: Nevojiten 170 milionë euro investime

“Investimet e nevojshme për të siguruar furnizimin 24 orë me ujë në Tiranë kapin vlerën 170 milion euro, nga të cilat 120 milionë euro do të merren kredi dhe pjesa tjetër do të mbulohet nga Ujësjellës-Kanalizime Tiranë” . Të dhënat bëhen me dije nga nëndrejtoresha e këtij institucioni, Evis Gjebrea, e cila thotë për TV SCAN se me propozimin e rritjes së tarifës së ujit do të investohet fillimisht në linjat e transmetimit.

“Investimet në total janë 170 milionë euro, nga të cilat 120 milionë janë të nevojshme për të marrë kredi dhe pjesa tjetër do të mbulohet nga Ujësjellësi i Tiranës me anë të rritjes që ajo vetë do të ketë duke shtuar kontratat, duke formalizuar lidhjet e paligjshme. Më së pari investimet do të fillojnë në rrjetin e transmetimit, kjo pasi edhe humbjet janë në këtë rrjet.

Janë disa linja kryesore, kemi tre burime kryesore: Bovillën, Shën Mërinë, Selitën dhe kryhen lidhje të paligjshme edhe pse presioni i ujit është më i madh në këto linja dhe më së pari investimet do të fillojnë në këto linjat e transmetimit, ku për një kohë të gjatë nuk është investuar. Rrjeti është shumë i amortizuar dhe ndonëse janë kryer investime, ato kanë qenë investime rehabilitimi, kanë qenë investime emergjence dhe nuk ka patur një plan në mënyrë që të ndërhyhet dhe të parandalohen me kohë problemet që mund t’i vijnë rrjetit të ujësjellësit”, u shpreh ajo.

Sipas Gjebreas, investimet do të fokusohen edhe te shtimi i burimeve të ujit.

“Do të shtojmë burimet, kjo është shumë e rëndësishme sepse sot Tirana përveçse burimeve ujore që janë me rrjedhje të lirë, ka dhe puse, ka edhe stacione pompimi të cilat konsumojnë energji dhe është një kosto tejet e lartë. Kostoja zë diku tek 19% të kostos së shpenzimeve operative. Dhe në këtë kuptim, duke shtuar këto burime do të dalin nga funksioni dhe këto stacionet e pompimit duke reduktuar kostot e energjisë dhe duke patur dhe një ujë natyror, pra burime me rrjedhje të lirë”, tha Gjebrea.

Sipas nëndrejtoreshës së Ujësjellës Kanalizime Tiranë, rritja e tarifës me 20 lekë për abonentët familjarë ishte më ekonomikja pas përllogaritjeve dhe planit 5-vjeçar të biznesit.  Ndërkohë që, nëse Enti Rregullator i Ujit miraton propozimin e Bashkisë, të ardhurat e UKT-së do të rriten me 90%.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.