Turqia tremb Gjermaninë – “Rrezik i ri për ekonominë tonë, i shtohet Brexit dhe Shba”
Kriza e Lirës turke përbën një rrezik shtesë për ekonominë gjermane, në një kohë që lufta tregtare me Shtetet e Bashkuara duket në kulm dhe në një kohë që Britania bëhet gati të dalë edhe formalisht nga Bashkimi Europian, pa një marrëveshje, deklaroi Ministria Gjermane e Ekonominë nëpërmjet një deklarate.
Lira turke ka humbur 40% të vlerës së saj kundrejt Dollarit amerikan gjatë këtij viti, që është përkeqësuar edhe nga përplasja diplomatike me Shtetet e Bashkuara të Amerikës, por edhe nga alarmi i investitorëve në lidhje me influencën e Erdogan mbi politikat monetare.
Gjermania është investitori i dytë i huaj më i madh në Turqi. “Rreziqet mbeten të pranishme, sidomos në një kohë që debati mbi tarifat dhe lufta tregtare po mbyslin aktivitetin e tregtisë”, deklaron Ministria Gjermane e Ekonomisë.
“Zhvillimet e fundit ekonomike në Turqi përbëjnë një rrezik të ri të jashtëm”, thuhet më tej.
Pavarësisht këtyre rreziqeve, ekonomia më e madhe e Europës mbetet e fortë, duke marrë shtysë nga shpenzimet e forta, konsumi privat, normat e ulëta të interesit dhe një treg i fuqishëm pune, thotë më tej Ministria.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.