Zhdëmtimi i pacientëve – Spitalet, kontrata sigurimi për garantimin e përgjegjësisë
Spitalet publike, që do të arrijnë të klasifikohen si autonomë do të kenë të drejtë të lidhin kontrata sigurimi për të garantuar përgjegjësinë publike për dëmet që mund t’i shkaktojnë palëve të treta ose profesionistit shëndetësor si rezultat i ushtrimit të veprimtarisë të tij në fushën e kujdesit shëndetësor.
Sipas një projektligji të propozuar nga Ministria e Shëndetësisë dhe Mbrojtjes Sociale, kontrata e sigurimit të përgjegjësisë duhet të jetë në fuqi për aq kohë sa ushtrohet veprimtaria e spitalit publik autonom dhe profesionistit shëndetësor. Lidhja e kontratave të sigurimit është një kërkesë e hershme e Urdhrit të Mjekëve të Shqipërisë, por edhe përfaqësuesve të tjerë të profesionistëve të shëndetit, duke qenë se dëmshpërblimi i të sëmurëve të dëmtuar nga mosrespektimi i rregullave gjatë ushtrimit të detyrës nga personeli mjekësor ose mosdhënia ne kohe e ndihmës urgjente mjekësore kthehej përgjithësisht përkthehet në prangosje të mjekëve.
Megjithatë, projektligji e lë në dorë të spitaleve autonomë lidhjen e kontratave të sigurimit, duke mos vendosur detyrime konkrete. Ndërkaq, spitali autonom financiar, si një koncept që futet për herë të parë në sistemin spitalor shqiptar, do të ketë mundësi të krijojnë vetë të ardhura. Gjithashtu, spitalet që do të përfitojnë këtë status do të kenë autonomi në drejtim të menaxhimit të burimeve njerëzore apo të investimeve që do të vendosin të kryejnë sipas nevojave të spitalit.
Këto institucione do të kenë të drejtë të shesin shërbimin e tyre në institucionet e sigurimeve shëndetësore të Republikës së Shqipërisë dhe të shteteve të huaja si dhe të lidhin kontrata me palë të treta për ofrimin e shërbimeve, por pa cenuar qëllimin fillestar të krijimit të tyre.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.