Amazon, tashmë edhe në Turqi
Amazon filloi ditën e mërkurë aktivitetin e shitjeve edhe në Turqi, duke ofruar produkte në 15 kategori për klientët anembanë vendit. Shpërndarësi më i madh i tregtisë elektronike do të shesë libra, pajisje elektronike, orendi të ndryshme dhe mallra për fëmijë, duke përfshirë kështu gamën e mbi 1.000 bizneseve turke.
Alpagut Cilingir, kreu i shërbimeve të shitësit për operimin turk të Amazon, tha se shërbimi i ri do të nivelonte fushën e lojës mes bizneseve të mëdha dhe të vogla si dhe do të fuqizonte kompanitë vendase të çdo madhësie për të rritur biznesin e shitjeve online në internet.
“Ne po investojmë për ti ndihmuar sadopak shitësit për tu bërë të suksesshëm në mënyrë që ata të shesin më shumë dhe kompania të bëjë progres”, tha Z.Cilingir. Në Turqi, Amazon shton një komb prej më shumë se 80 milion njerëz në tregjet në të cilat vepron.
Ekonomia e Turqisë u rrit 7.4 përqind vitin e kaluar dhe ndërkohë që rritja pritet të ngadalësohet në 2018, me 4.1 përqind ende ka gjasa që të tejkalojë shumë ekonomi të tjera evropiane. Amazon gjithashtu po kërkon të zgjerohet në tregje të reja në vendet ku tashmë operon.
Muajin e kaluar u raportua se Amazon po konsideron krijimin e një faqeje të re mbi shoqëritë e sigurimeve. Gjigandi i tregtisë elektronike thuhet të jetë në bisedime me disa nga siguruesit më të mëdhenj të Evropës mbi faqen e re. Nuk është ende e qartë se cilat produkte mund të ofrohen në sipërmarrjen e re të Amazon, apo kur ajo mund të nisë.
Ada Xhagolli/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.