BE i hap dritën e gjelbër Italisë – Miratohet ndihma 5.4 mld euro për bankën më të vjetër në botë
Bashkimi Europian ka miratuar shpëtimin nga shteti italian prej 5.4 miliardë euro të huadhënësit më të vjetër në botë, “Monte dei Paschi di Siena”, duke e çuar shumën totale të taksapaguesve italianë të përdorur për shpëtimin e bankave në javën e fundit në më shumë se 20 miliardë euro.
Rregullatori i ndihmave shtetërore të BE-së deklaroi se Roma mund të injektojë 5.4 miliardë euro te “Monte dei Paschi”, pasi banka ra dakord për një riorganizmi drastik që përfshin transferimin e kredive të këqija dhe vendosjen e një tavani për pagat e menaxherëve.
Mungesa e kapitalit të detyrueshëm të bankës qëndron tashmë në 8.1 miliardë euro, në rënie nga 8.8 miliardë që llogaritej më parë nga Banka Qendrore Europiane. Më pak se një javë më parë, Italia premtoi një shumë prej 17 miliardë euro, kryesisht në garanci, për të parandaluar zotëruesit e borxhit, depozituesit dhe stafin që të goditen nga trazirat e dy bankave rajonale, “Popolare di Vicenza” dhe “Veneto”.
Marrëveshja e javës së kaluar përfshiu gjithashtu bankën më të madhe retail të vendit, “Intesa Sanpaolo”, që i bleu të dy huadhënësit për 1 euro. “Monte dei Paschi” deklaroi pas vendimit se pret që të raportojë një fitim neto prej 1.2 miliardë euro në vitin 2021, prej planit të ristrukturimit të miratuar nga Komisioni Europian.
Banka deklaroi se plani për 2017-2021, përfshin reduktimin e rreth 5,500 vende pune dhe numri i degëve pritet të bjerë në 1,400 nga rreth 2,000 që ishte në 2016-ën. Banka do të shesë një shumë bruto të kredive të këqija prej 28.6 miliardë euro, nga të cilat 26.1 miliardë do të titullizohen. Banka deklaroi se pret që raporti i mjaftueshmerisë së kapitalit të arrijë në 14.7% deri në vitin 2021.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.