BERZH miraton strategjinë e re 5-vjeçare për Serbinë – Ekonomia do të rritet me 2.9% në 2018
Bordi i Drejtorëve të BERZH-it ka miratuar një strategji të re për Serbinë e cila do të udhëheqë investimet dhe punën e politikës së Bankës në vend për pesë vitet e ardhshme.
Strategjia 2018-23 përcakton prioritetet e mëposhtme:
– të nxisë konkurrencën dhe qeverisjen duke nxitur kompanitë private dhe reformimin e ndërmarrjeve shtetërore dhe të shërbimeve publike;
– të përmirësojë integrimin duke përmirësuar rrjetin e transportit, duke mbështetur lidhjen ekonomike rajonale dhe duke avancuar ndërlidhjet e energjisë;
– të mbështesin ekonominë e gjelbër nëpërmjet investimeve në energjinë e rinovueshme, si dhe promovimin e praktikave të qëndrueshme në të gjithë industrinë.
Në vitin 2017, BERZH ofroi mbi 380 milionë euro në më shumë se 20 projekte nëpër sektorë të ndryshëm të ekonomisë serbe. Investimet përfshinin kredi për ndërtimin e dy fermave të turbinave me erë, përmirësimin e depove të mirëmbajtjes hekurudhore, modernizimin e kontrollit të trafikut ajror, zgjerimin e një qendre tregtare në Beograd etj.
Investimet e mëdha të BERZH përkthehen në rritje ekonomike për Serbinë.
“Duke stabilizuar mjedisin makro ekonomik, ne projektojmë që ekonomia serbe do të rritet me 2.9 për qind në 2018. Me këtë bazë pozitive, është momenti i duhur ku Serbia duhet të përqendrohet edhe më fort në reformat”, tha Dan Berg, Drejtori i BERZH-it për Serbinë.
BERZH është një investitor kryesor në Serbi. Deri më sot, ka investuar 4.7 miliardë euro në rreth 200 projekte në vend.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.