Bllokohet “Maqedoni-Greqi” – Progres i kushtëzuar, ministrat e Jashtëm ngecin në çështjet kyç
Një ndër çështjet më të nxehta në rajon sot, ende nuk po merr dot zgjidhje. Mosmarrëveshjet mes Greqisë dhe Maqedonisë sa i përket emrit zyrtar të kësaj të fundit duket se do të vazhdojnë edhe për disa kohë. Takimi i ministrave të jashtëm të të dy vendeve nuk i`a ka dalë dot të sheshojë mosmarrëveshjet kryesore. Mes dy vendeve mbeten ende çështje të pazgjidhura.
“Në të ardhmen do të ketë një seri takimesh dhe ne kemi bërë gati planin e punës. Pa u futur në detaje mund t`iu them se, çështjet më të rëndësishme do të adresohen. Ende ka shumë çështje të vështira për tu zgjidhur, po në mendimin tim, ka një ndjesi mjaft pozitive”, -deklaroi Matthew Nimetz, negociatori i Kombeve të Bashkuara mes palëve për këtë çështje.
“Të dy ministrat janë të fokusuar te marrëdhënia afat-gjatë, stabiliteti i rajonit dhe mbi rëndësinë e marrëdhënieve të mira mes dy vendeve dhe unë kam besim se do të mund të vazhdojnë punën e mirë”-shtoi ai.
Ministri i Jashtëm i Maqedonisë ndërkohë, Nikola Dimitrov, shtoi se, takimi me homologun e tij ishte mjaft konstruktiv, por me një progres të kushtëzuar, pasi bisedimet ngecën në çështjet kryesore. Ka ende diferenca mes nesh, por mund të them se takimi ishte produktiv, dhe mund të arrijmë progres”-nënvizoi ai.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.