Covid-19 “lë gjurmë” te Eurozona, FMN: “Nëse situata nuk ndryshon, ekonomia do të pësojë ngadalësim”

Fondi Monetar Ndërkombëtar ka paralajmëruar se nëse situata e pandemisë nuk ndryshon në muajt e ardhshëm në Europë, rritja ekonomike pritet të jetë më e dobët se projeksionet e mëparshme.  Në deklaratën përfundimtare të 2020 për Eurozonën, FMN theksoi gjithashtu se do të duhen stimuj shtesë fiskalë dhe monetarë, për të mbështetur rajonin.

Fondi paralajmëroi se rimëkëmbja ekonomike në 19 vendet që ndajnë euron po kërcënohet nga vala e dytë e koronavirusit, që së bashku me rivendosjen e masave të karantinës, kanë dëmtuar besimin dhe lëvizjen e njerëzve.  Vala e dytë e pandemisë ka bërë që rimëkëmbja ekonomike e parë në tremujorin e tretë të këtij viti, me shumë mundësi të ndiqet nga një ngadalësim në fundvit. Fondi shton se nëse situata nuk ndryshon bindshëm, do të ketë një ngadalësim edhe në nisje të vitit të ardhshëm.

“Kriza e tejzgjatur shëndetësore dhe rimëkëmbja më e ngadaltë, do të sjellin kushte të shtrënguara financiare dhe rritje të cënueshmërive të sektorit publik dhe privat”- deklaron FMN. Sipas fondit në Washington, duhet të kalohen barrierat në kalimin e paketës prej 750 miliardë euro të BE, si dhe të shpërndahen fondet, pasi vonesa e tyre do të cënonin perspektiven e rajonit.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.