FMN: Maqedonia ‘të kapë’ mundësinë e integrimit në BE, do të ketë rritje ekonomike
Maqedonia duhet të kapë mundësinë e integrimit më të shpejtë në BE për të ecur përpara me reformat që do të mundësojnë rritje më të fortë ekonomike, tha Fondi Monetar Ndërkombëtar.
Marrëveshja e Shkupit me Athinën për të ndryshuar emrin e vendit në Republikën e Maqedonisë Veriore është vendosur të zhbllokojë ofertat e saj për anëtarësim në NATO dhe BE. Parlamenti pritet të miratojë ndryshimet kushtetuese dhe zyrtarisht të miratojë emrin e ri deri në fund të janarit. “Një shtytje vendimtare për reformat strukturore dhe hapjen e negociatave të pranimit në BE mund të nxisë rritjen nëpërmjet hyrjeve më të larta të kapitalit dhe rritjes së besimit”, tha FMN në një deklaratë pas vizitës së misionit të saj në vend.
Huadhënësi tha sipas Reuters, se ekonomia e Maqedonisë parashikohet të rritet 2.8 për qind në 2019, pas 2 për qind këtë vit. Rritja pritet të arrijë 3.5 për qind në periudhën afatmesme, bazuar në investimet e planifikuara të infrastrukturës dhe eksporteve më të forta. Por, pasiguria politike e ripërtërirë mbetet një rrezik kyç, tha fondi. Qeveria duhet të adresojë dobësitë e tregut të punës, të tilla si mungesa e aftësive dhe migracioni për motive punësimi, në një vend me një normë zyrtare papunësie prej 21 për qind. FMN rekomandoi reforma për të forcuar qeverisjen, sundimin e ligjit dhe sistemin gjyqësor dhe për të trajtuar evazionin fiskal. Ndërsa sektori bankar është i shëndetshëm, me bankat e kapitalizuara mirë dhe fitimprurëse, duhet të sigurohet pavarësia operacionale e bankës qendrore dhe të intensifikohet mbikëqyrja për bankat e rëndësishme sistematike.
E.T/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.