FMN, takimi i pranverës – “Rreziqet botërore mund të zgjidhen me bashkëpunim ndërkombëtar”
Shefja e Fondit Monetar Ndërkombëtar, Christine Lagarde, tha se shumë rreziqe të mundshme ndaj ekonomisë botërore mund të trajtohen nëpërmjet politikave të brendshme dhe bashkëpunimit ndërkombëtar.
Gjatë një konference në takimin vjetor të pranverës së fondit, Lagarde shpjegoi se Organizata uli 3 projeksionet për rritjen e ekonomisë botërore në gjashtë muajt e fundit, kryesisht prej konflikteve tregtare, tkurrjes së politikave monetare dhe rritjes së pasigurisë në vendimmarrje në shumë shtete. Shefja e Fondit Monetar Ndërkombëtar i bëri thirrje të gjithë vendeve që të braktisin barrierat artificiale që pengojnë zhvillimin ekonomik botëror, si ç’janë proteksionizmi tregtar dhe tarifat.
“Ajo që duhet të na bëjë optimistë është fakti se të gjitha rreziqet që përmenda, mund të trajtohen në mënyrë efektive nëpërmjet politikave të brendshme dhe bashkëpunimit në nivel ndërkombëtar.” –tha Christine Lagarde.
Christine Lagarde shprehu gjithashtu optimizëm për Kinën, pasi ajo mendon se vendi, pavarësisht normës më të ulët të rritjes ekonomike, po tregon rritje cilësore.
“Projeksionet për rritjen ekonomike kineze qëndrojnë në 6.3% këtë vit dhe 6.1% në tjetrin. Një rënie e lehtë vit pas viti, tregon se vendi po pëson një rritje cilësore të ekonomisë. Stimujt e fundit të autoriteteve kineze kanë qenë të mirëpritura.” -tha Lagarde.
Në takimin vjetor, Fondi Monetar Ndërkombëtar dhe Banka Botërore, i bën thirrje vendeve që të mbështesin multilateralizmin dhe të reduktojnë ndërhyrjen dhe influencën e faktorëve gjeopolitikë në vendimmarrjen ekonomike.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.