Fondi i Ballkanit Perëndimor, nënshkruhet marrëveshja me RYCO – Synohen aktivitete të përbashkëta në të ardhmen

Ditën e Premte në Tiranë u nënshkrua memorandumi i mirëkuptimit mes Fondit të Ballkanit Perëndimor (WBF) dhe Zyrës Rajonale për Bashkëpunimin e të Rinjve (RYCO). Në praninë e zyrtarëve të lartë nga ministritë e jashtme të 6 vendeve të Ballkanit Perëndimor, dy organizatat firmosën dokumentin me rëndësi për zhvillimin politik të rajonit, i cili do t’u shërbejë si WBF dhe RYCO, por edhe vetë Ballkanit Perëndimor.

Thelbi i marrëveshjes është dhënia e një mesazhe për partnerët dhe donatorët potenciale në rajon, Europë dhe më tutje, për aktivitete të përbashkëta dhe bashkëpunim në të ardhmen.

“Sot WBF dhe RYCO firmosin një dokument që hap rrugë dhe krijon një kornizë për aksione dhe aktivitete të përbashkëta në të ardhmen”, u shpreh Gjergj Murra, drejtori ekzekutiv i fondit.

Nga ana tjetër, sekretari i përgjithshëm i RYCO, Djuro Blanusa, tregoi se për thirrjet e dy organizatave ka patur një numër shumë të lartë aplikimesh, ndaj ky bashkëpunim është shumë i rëndësishëm, por nevojitet edhe mbështetja e qeverive.

“Një rajon më i mirë mund të arrihet vetëm nëse qeveritë tregojnë këtë mbështetje edhe në fusha të tjera gjithashtu, por edhe duke ofruar më shumë burime për punën tonë, pasi sektorët ku po punojmë direkt mund të përthithin shumë më tepër fonde”, tha Blanusa.

Memorandumi përfshin edhe organizimin e takimeve të shpeshta mes palëve, si dhe trajnimin e përbashkët të punonjësve.

Fondi i Ballkanit Perëndimor u krijua me misionin për të forcuar lidhjen mes vendeve të rajonit, duke mbështetur fushat e bashkëpunimit ndërkufitar. Ndërsa RYCO është themeluar nga 6 vendet pjesëmarrëse dhe funksionon si një mekanizëm institucional me synimin për të promovuar frymën e pajtimit dhe bashkëpunimit mes të rinjve të rajonit, përmes programeve të shkëmbimit.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.