Kina dhe Gjermania përballë tarifave – Do bashkëpunojnë për të trajtuar mbikapacitetin në tregun e çelikut
Kancelarja gjermane Angela Merkel dhe presidenti kinez, Xi Jinping, kanë diskutuar për mbikapacitetin në tregun e çelikut dhe kanë rënë dakord për të bashkëpunuar mbi këtë çështje brenda kuadrit të grupit të 20 vendeve të industrializuara G20. Liderët e sapozgjedhur i dhanë rëndësi lidhjes mes vendeve, që përballen me kërcënimin e tarifave nga SHBA mbi çelikun dhe aluminin dhe ranë dakord për të thelluar partneritetin strategjik.
Ata theksuan gjithashtu rëndësinë e bashkëpunimit shumëpalësh mbi tregtinë globale. Sipas agjencisë shtetërore mediatike në Kinë, Xinhua, Xi Jinping i tha Merkel se të dy vendet duhet të bëhen partnerë pavarësisht ndasive ideologjike. Nga ana tjetër zyrtarët e Shteteve të Bashkuara kanë thënë se do të diskutojnë me vendet që ndajnë të njëjtat ideologji me to, në samitin e G20-ës që nis në fillim të javës në Argjentinë.
Trump ka kritikuar Gjermaninë dhe Kinën për suficitet tregtare me Shtetet e Bashkuara, që kur nisi detyrën në vitin 2017. Merkel tha këtë fundjavë se suficitet tregtare të Gjermanisë po ngushtohen për shkak të rritjes së kërkesës së brendshme dhe se Qeveria do të vazhdojë të mbështesë këtë tendencë.
Ministri gjerman i Ekonomisë, Peter Altmaier do të vizitojë Washingtoinin këtë javë për të kërkuar përjashtim nga tarifat mbi çelikun dhe aluminin. Ministri i ri i Financave, Olaf Scholz do të diskutojë mbi këtë çështje në takimin e G20-ës në Argjentinë me sekretarin e Thesarit , Steven Mnuchin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.