Kush mund të ushtrojë veprimtarinë e vlerësuesit të dëmeve në sigurime?
Çfarë është një vlerësues i dëmeve në sigurime?
Vlerësuesi i dëmeve në sigurime është personi i licencuar nga Autoriteti i Mbikëqyrjes Financiare për vlerësimin e dëmeve të ndodhura si pasojë e një ngjarje sigurimi. Procesi i vlerësimit përfshin mbledhjen e të dhënave dhe përllogaritjen e shumës që duhet të paguhet nga shoqëria e sigurimit për dëmet, si rezultat i ndodhjes së ngjarjes së sigurimit.
Kush mund të ushtrojë veprimtarinë e vlerësuesit të dëmeve në sigurime?
Veprimtaria e vlerësuesit të dëmeve në sigurime mund të ushtrohet vetëm nga personat fizikë apo juridikë të licencuar nga Autoriteti i Mbikëqyrjes Financiare. Të dhënat mbi vlerësuesit e dëmeve të licencuar publikohen në faqen online të Autoritetit të Mbikëqyrjes Financiare, në linkun http://www.amf.gov.al/tsigurimeve.asp?id=4&r=1 Vlerësuesit e dëmeve mund të ushtrojnë veprimtarinë e tyre si punonjës të shoqërisë së sigurimit ose si vlerësues të pavarur dëmesh.
Cilat janë shërbimet që marrim nga një vlerësues i dëmeve?
Vlerësuesit e dëmeve, bazuar në treguesit dhe koeficientët e përcaktuar nga Institucionet kompetente për përcaktimin e shkallës së dëmtimit, sipas akteve ligjore e nënligjore në fuqi, përcaktojnë në mënyrë profesionale dhe të paanshme shumën e dëmshpërblimit që shoqëria e sigurimit detyrohet të paguajë ndaj personave të siguruar, për dëmet si rezultat i ndodhjes së ngjarjes së sigurimit, deri në limitin e përgjegjësisë të përcaktuar sipas kontratës së sigurimit.
Parimi bazë
Vlerësuesi i dëmeve kryen vlerësimin në mënyrë të paanshme dhe të pavarur, duke respektuar parimin një vlerësim për një ngjarje sigurimi.
Informacion edukues, faqja zyrtare e Autoritetit të Mbikëqyrjes Financiare
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.