‘Mega-plani’ i Maqedonisë së Veriut: Zëvendëson qymyrin me energji diellore. 4 TECE në minierat e dikurshme!

Ndërmarrja shtetërore e Maqedonisë së Veriut Elektrani na Severna Makedonija (ESM) ja bërë me dije se do të ndërtojë katër termocentrale diellore fotovoltaike në minierat e saj të shteruara të qymyrit në kompleksin energjetik REK Manastir.

ESM synon të instalojë panele diellore me një kapacitet total prej 280 MW, që është një zgjerim i planit fillestar për tre termocentrale me një kapacitet të përgjithshëm prej 160 MW.

Termocentrali i thëngjillit në Manastir 650 MW, më i madhi në vend, planifikohet të zëvendësohet me termocentrale me energji diellore dhe me gaz. Javën e kaluar Maqedonia e Veriut përuroi parkun e saj të parë diellor në një minierë të braktisur qymyri, në Oslomej.

Sipas planit të përditësuar, ESM synon të ndërtojë një termocentral 20 MW shumë afër termocentralit të Manastirit. Një konsulent i zgjedhur nga Banka Evropiane për Rindërtim dhe Zhvillim (BERZH) ka përgatitur një projekt konceptual për objektin dhe tani përgatitja e specifikimeve teknike dhe dokumentacionit të tenderit për zgjedhjen e një kontraktori është duke u zhvilluar, tha shoqëria.

ESM ka zgjeruar planin e saj të mëparshëm për të instaluar tre objekte fotovoltaike me një kapacitet total prej 160 MW

Një impiant i paneleve diellore prej 60 MW do të ndërtohet në minierën e braktisur të Suvodolit, ku po zhvillohet një tender për përzgjedhjen e konsulentit për përgatitjen e studimeve të fizibilitetit dhe mjedisit. Banka Gjermane për Zhvillim KfW siguroi fondet.

Në vendodhjen e minierës së Suvodolit do të ndërtohet edhe një park diellor 100 MW, ndërsa i katërti me kapacitet të instaluar 100 MW është në minierën Brod-Gneotino.

Kompania po vazhdon përgatitjet për ndërtimin e një termocentrali 250 MW me gaz.

Po ashtu janë duke u përgatitur edhe për ndërtimin e termocentralit me gaz në REK Manastir, me kapacitet prej 250 MW, i cili do të sigurojë energji elektrike dhe ngrohje për Novacin, Mogillën dhe Manastirin. Aktualisht është në ndërtim e sipër një tubacion për ngrohje qendrore nga REK Manastir në këto tre vendbanime.

Të gjitha projektet e përmendura janë pjesë e tranzicionit energjetik të REK Manastirit, me qëllim zëvendësimin e thëngjillit në prodhimin e energjisë elektrike brenda dekadës së ardhshme, tha ESM, duke shtuar se punëtorët nga REK Manastir do të trajnohen për të punuar në objektet e reja.

Krahas projekteve të ESM-së, kompania private DTPU Mej grup po përgatitet të instalojë një termocentral diellor 50 MW në komunën e Novacit.

Ministri i Ekonomisë Kreshnik Bekteshi tha javën e kaluar se heqja e qymyrit në Maqedoninë e Veriut dhe kalimi në burimet e rinovueshme do të përfundojë brenda dhjetë vjetësh.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.