Nafta shfaqet e qëndrueshme – Çmimet vijojnë të mbështeten nga marrëveshja e OPEC
Çmimet e naftës po shfaqen të qëndrueshme në sesionin e sotëm dhe po tregtohen pranë nivelit më të lartë për këtë vit.
Ulja e prodhimit nga OPEC dhe sanksionet amerikane ndaj Venezuelës dhe Iranit kanë krijuar një deficit të lehtë në furnizimin global, në tremujorin e parë të këtij viti. Megjithatë, rritja më e madhe e çmimeve është parandaluar nga prodhimi më i lartë në SHBA dhe nga ngadalësimin i ekonomisë globale.
Nafta Brent e Londrës po tregtohet në rreth 67.4 dollarë për fuçi, ndërsa nafta Bruto amerikane po tregtohet në rreth 58.7 dollarë për fuçi. Që nga fillimi i këtij viti, çmimet e naftës janë rritur me rreth 25%. Organizata e Vendeve Eksportuese të Naftës dhe aleatët e tjerë jashtë organizatës, që ndryshe njihen si OPEC+, kanë rënë dakord të ulin prodhimin me 1.2 milionë fuçi në ditë, që nga fillimi i këtij viti. Ministrat e vendeve prodhuese do të takohen sërish më 17-18 prill në Vjenë.
Investitorët janë të shqetësuar edhe për ngadalësimin e ekonomisë globale, sidomos në Azi, Europë dhe Shtetet e Bashkuara të Amerikës. Megjithatë, deri më tani kërkesa për naftë ka qenë e lartë. Përdorimi i naftës bruto në Kinë, që është importuesi më i madh në botë, u rrit me 6.1% në dy muajt e parë të këtij viti, në një rekord prej 12.68 milionë fuçi në ditë.
Ndërkohë, në një shënim për klientët e saj, banka Goldman Sachs tha se, rritja e kërkesës globale për naftë ishte me rreth 2 milionë fuçi në ditë, ndërsa fuqizimi është vënë re si në vendet e zhvilluara ashtu edhe në vendet në zhvillim. Për këtë arsye, banka amerikane parashikon se nafta Brent mund të rritet drejt 70 dollarëve për fuçi.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.