OBSH i bën thirrje publikut për vigjilencë. Rastet e lidhura me variantin e ri janë përhapur në shumë vende

Organizata Botërore e Shëndetësisë, i bëri thirrje publikut që të qëndrojë vigjilent gjatë sezonit të pushimeve, ndërkohë që rastet e lidhura me variantin e ri të Covid-19 janë shfaqur edhe në vende të tjera. Gjatë një konferencë në Gjenevë, drejtorja teknike e organizatës, Maria Van Kerkhove, tha se shtetet kanë nisur sekuencimin e variantit të ri të virusit tejet të ngjitshëm dhe kërimin e rasteve të lidhura me të.  Mbartësit e virusit që ka pësuar mutacion janë zbuluar në Australi , Islandë, Itali, Hollandë dhe Danimarkë. Kerkhove tha se një variant i ri në Afrikën e Jugut, pavarësisht se në të njëjtën periudhë kohe, është i ndryshëm nga ai në Britani.  Duke theksuar se shumë vende kanë marrë masa në kundërpërgjigje të variantit në Mbretërinë e Bashkuar, drejtori i emergjencave i Organizatës, Michael Ryan, kërkoi gjithashtu gatishmëri nga publiku për të ndaluar transmetimin.

“Shtetet po veprojnë në parimin e parapërgatitjes. Ato po ndërmarrin masat më të lart dhe kanë vendosur kufizime të udhëtimeve, ndërkohë që vlerësojnë rrezikun në lidhje me virusin.  Ndërsa hyjmë në sezonin e pushimeve, duhet të ndalojmë të gjithë variantet e Covid-19.”

Kryeministri britanik, Boris Johnson, lajmëroi në fundjavë masa të ashpra të karantinës, përballë rritjes së ndjeshme të  normës infeksionit të lidhur me një variant të ri të virusit, që sipas shkencëtarëve është 70% më i transmetueshëm. Shtete përfshirë Belgjikën, Francën, Gjermaninë dhe shumë të tjera, kanë ndaluar hyrjet nga Britania, pas emergjencës në lidhje me virusin e ri.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.