PBB e Afganistanit mund të bjerë 20% – Pas marrjes nën kontroll të talebanëve, Fitch Solutions përditëson parashikimet
Ekonomia e Afganistanit mund të tkurret deri në 20% këtë vit dhe monedha e saj mund të zhvlerësohet më tej, pas marrjes së kontrollit nga talebanët, deklaroi agjencia Fitch Solutions.
“Ka mundësi që ekonomia e vendit të tkurret ndjeshëm këtë vit”, deklaroi kreu i departamentit për Azinë në Fitch Group. Sipas tij, vendet që përballen me rrethana të ngjashme si Mianmar dhe Siria kanë regjistruar një rënie të Prodhimit të Brendshëm Bruto me rreth 10-20%, gjë që nuk mund të përjashtohet edhe për Afganistanin.
Agjencia gjithashtu parashikon një rënie të ndjeshme të granteve dhe ndihmave nga jashtë, që janë edhe një burim kryesor i financimit të Afganistanit. “Disa shifra nga OKB -ja sugjerojnë se ndihma do të tkurrej me të paktën 20% nga nivelet e vitit 2020 në 2021 pas largimit nga SHBA, por kjo nuk llogariste marrjen e shpejtë të pushtetit nga talebanët.
Monedha afgane, e cila tashmë është dobësuar më shumë se 7% këtë muaj kundrejt dollarit amerikan, mund të bjerë më shumë sepse shumica e pasurive të shtetit janë ngrirë për të ndaluar talebanët të kenë akses. Sipas agjencisë Fitch, nuk mund të përjashtohet edhe hiper-inflacioni.
Sistemi i brishtë shëndetësor i Afganistanit është dëmtuar nga lufta me dekada. Perspektivat e vendit për marrjen e vaksinave COVID-19 ishin gjithmonë të dobëta, por tani situata është bërë “e zymtë”.
Agjencia e vlerësimit Moody’s Investors Service ka paralajmëruar për rreziqe gjeopolitike dhe ekonomike për rajonin. Afganistani është i pasur me burime natyrore si bakër, ar, naftë, gaz natyror, uranium, boksit, qymyr, litium, krom, plumb, zink, gurë të çmuar, squfur, gips, mermer, etj.
Zyrtarë të OKB dhe Shteteve të Bashkuara shqetësohen se kaosi në Afganistan po krijon kushte për prodhimin edhe më të lartë të opiumit, një ndihmë e çmuar për talebanët. Zyrtarët e OKB -së raportuan se talebanët mund të kenë fituar më shumë se 400 milionë dollarë në vitet 2018 dhe 2019 nga tregtia e drogës.
“Talibanët nuk do të varfërohen, vlerëson një raport i OKB, që ka vlerësuar se ata fitojnë deri në 1.6 miliardë dollarë në vit, shumica prej tyre përmes kanaleve ilegale, të cilat ata mund të institucionalizojnë.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.