Përforcuesi i vaksinës ul ndjeshëm rrezikun – Të dhënat e Ministrisë së Shëndetësisë pas nisjes së dozës së tretë me Pfizer

Një dozë e tretë e vaksinës COVID-19 të Pfizer ka përmirësuar ndjeshëm mbrojtjen nga infeksioni dhe sëmundjet serioze tek njerëzit e moshës 60 vjeç e lart në Izrael në krahasim me ata që morën dy vaksina, treguan gjetjet e publikuara nga Ministria e Shëndetësisë.

Zyrtarët e Ministrisë thanë se midis njerëzve të moshës 60 vjeç e lart, mbrojtja kundër infeksionit e siguruar 10 ditë pas një doze të tretë ishte katër herë më e lartë se pas dy dozave. Kjo grupmoshë është veçanërisht e prekshme ndaj COVID-19 dhe në Izrael ishte e para që u vaksinua kur nisi procesi i vaksinimit në fund të dhjetorit 2020.

Javët e fundit, Ministria e Shëndetësisë ka thënë se imuniteti është zvogëluar me kalimin e kohës, si për të moshuarit, ashtu dhe për të rinjtë. Shumica e njerëzve të vaksinuar që u sëmurën rëndë në Izrael ishin mbi 60 vjeç.

Izraeli filloi të administrojë dozat e treta te personat mbi 60 vjeç më 30 korrik. Të enjten e kaluar u ul mosha e përshtatshmërisë për një dozë të tretë në 40 vjeç dhe përfshiu gratë shtatzëna, mësuesit dhe punonjësit e kujdesit shëndetësor. Dozat e treta u jepen vetëm atyre që kanë marrë dozën e dytë të paktën pesë muaj më parë.

Shtetet e Bashkuara kanë njoftuar planet për të ofruar doza përforcuese për të gjithë amerikanët, duke cituar të dhëna që tregojnë mbrojtje të zvogëluar. Kanadaja, Franca dhe Gjermania kanë shpallur fushata përforcuese.

Duke luftuar një shpërthim të variantit Delta që nga qershori, Izraeli aktualisht ka një nga nivelet më të larta të infeksionit në botë për frymë. Afro 1.5 milion njerëz nga 9.3 milion popullsia e vendit kanë marrë dozën e tretë.

Klevis Llaha/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.