Problemi i radhës, nëse funksionon vaksina. Izraeli ofron privilegje për të vaksinuarit, të tjerët mbeten prapa
Izraeli ka qenë vendi i parë në botë për vaksinimin kundër Covid-19. Tashmë, po përballet me një tjetër sfidë që vendet e tjera e kanë përpara: si të balancojë shëndetin publik dhe të drejtat e të pavaksinuarve. Gjysma e izraelitëve kanë marrë dozën e parë dhe vendi ka nisur të rihapet këtë javë, pas një viti të karantinës dhe punës në distancë. Megjithatë, disa aktivitete janë konsideruar si të ndaluara për të pavaksinuarit, duke irrituar njerëzit që nuk mund të marrin vaksinën për arsye shëndetësore, apo ata që e refuzojnë për çështje parimore. Disa punëdhënës kanë planifikuar të ndalojnë punëtorët e pavaksinuar në zyrë, gjë për të cilën sindikatat shqetësohen se mund t’i kushtojë me vendin e punës. Sindikatat kanë sugjeruar zgjidhje alternative, si testimi për Covid çdo 72 orë. Izraeli, ku shpërnarja e vaksinës është e shpejtë, por jo e detyrueshme, është kthyer në një lider botëror të vaksinimit.
“Kushdo që nuk vaksinohet, do mbetet mbrapa”- paralajmëroi ministri i Shëndetësisë, Yuli Edelstein. Ministri e ka bërë të qartë se përfitimet për të vaksinuarit, përfshirë akses në teatër, palestra dhe resorte, janë incentiva për t’u vaksinuar. Por disa punëdhënës janë shqetësuar se parlamenti nuk ka kaluar ndonjë ligj të ri që trajton rikthimin e punëtorëve në zyra apo mbrojtje për të pavaksinuarit, çka detyron punëdhënësit të marrin vendimet e tyre. Diskutimet e hershme mbi udhëzimet dhe ligjin sugjerojnë se punëdhënësit, autoritetet dhe gjykatat, do vendosin shqetësimin publik, përpara kërkesave individuale. Izraeli nisi në fundjavën e kaluar një sistem të “kalimit të gjelbër”, që i jep privilegje qytetarëve që kanë marrë të 2 dozat e vaksinës, apo janë shëruar vetë nga Covid-19.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.