Prodhuesi më i madh i CO2 pas Kinës dhe SHBA-së?! – Nuk është një vend por një material
Sasia e CO2 e emetuar çdo vit për të prodhuar çimento tejkalohet vetëm nga ajo e prodhuar nga Kina dhe SHBA, dhe është tre herë më e madhe se ajo e shkaktuar nga transporti ajror.
Nëse çimentoja do të ishte një vend, do të ishte emetuesi i tretë më i madh i gazrave serrë, pas Kinës dhe Shteteve të Bashkuara: çimentoja është materiali më i përdorur në Tokë, që konsumohet për shembull për të prodhuar beton në shkallën 150 ton në sekondë. Sipas Shoqatës Globale të Çimentos dhe Betonit (GCCA), rreth 14 miliardë metra kub beton derdhen çdo vit. Dhe kështu prodhimi i çimentos është përgjegjës për deri në 7 % të emetimeve globale të CO2, e barabartë me trefishin e emetimeve të prodhuara nga aviacioni.
Çimentoja është lidhësi kryesor që mban guralecët dhe gurët së bashku në beton. Përbëhet kryesisht nga klinkeri, i përftuar nga pjekja e argjilës dhe gurit gëlqeror në një furrë. Në këtë proces prodhohet dioksidi i karbonit, i cili përfundon në atmosferë. Për të furnizuar një ton çimento, procesi i pjekjes në 1400 ° C prodhon rreth një ton CO2. Ky sistem, i cili ka mbetur i pandryshuar që kur çimentoja u prodhua për herë të parë mbi 200 vjet më parë, është përgjegjës për 70 % të emetimeve, ndërsa 30 % e mbetur vjen nga energjia e përdorur për funksionimin e furrave të përpunimit.
Industria e betonit ka deklaruar synimin e saj për të qenë “neutrale ndaj karbonit” deri në vitin 2050. Si hap i parë, në tetor ajo vendosi një objektiv për të reduktuar emetimet “prej 25 % deri në vitin 2030”. Kjo do të bënte të mundur shmangien e emetimit të rreth 5 miliardë tonë CO2 në atmosferë gjatë dekadës së ardhshme. Jo një ndryshim epokal, por ende një hap përpara duke pasur parasysh që emetimet globale të dioksidit të karbonit nga njeriu janë rreth 37 miliardë tonë në vit.
Reduktimi ose eliminimi i emetimeve të CO2 nga sektori varet shumë nga teknologjitë si kapja dhe ruajtja e karbonit që ende nuk janë zbatuar në një shkallë të konsiderueshme. Por, për sa i përket industrisë së çimentos, ka edhe sisteme krejtësisht të reja, si riciklimi i betonit të vjetër dhe zëvendësimi i hidrokarbureve për furrat e tij me biokarburant.
Pasojat për planetin janë të larta: OKB-ja vlerëson se tre të katërtat e infrastrukturave botërore të nevojshme deri në vitin 2050 ende nuk janë ndërtuar dhe për këtë arsye çimentoja do të ketë ende një rol themelor. FOCUS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.