“Profecia” e investitorit të njohur: “Në 5 vite, pagesat do të bëhen të gjitha në kriptovalutë!”

Tim Draper, një nga vizionarët e botës hi-tech është mes investorëve të parë që besoi në potencialin e internetit, e tashmë është hedhur edhe në sektorin më në modë të momentit: në kriptovalutë. Sipas tij, bota po ndryshon në mënyrë radikale dhe në harkun e 5 viteve “të gjitha pagesat elektronike do të bëhen me kriptovaluta”.

Në një intervistë për CNBC në Shtetet e Bashkuara të Amerikës, ai ka shpjeguar se “për shkak të angazhimin inxhinierik dhe euforisë që ka pas, fokusi do të jetë me seriozitet te bitcoin dhe kriptovalutat e tjera të ngjashme” në të ardhmen.

Ai tha gjithashtu se është i bindur se këto janë mjetet që do të përdoren për pagesa në vitet e ardhshme.

Draper ka zbuluar se nuk ka qenë “asnjëherë kaq entuziast për një investim sesa tani”, duke kujtuar “bastin” e tij në lindjen e epokës së internetit. Me shpresën se profecia e tij do të përmbushet sërish, si në vitet 2000, njeriu që ka investuar te Tesla dhe Skype, ka blerë thuajse 30 mijë bitcoin në vitin 2014. Ky investim i ka sjellë atij një marzh fitimi mbi 1000 % duke qenë se kriptovalutat që ka në zotërim vlejnë 322 milion e gjysëm dollarë, sipas çmimeve të së martes së 7 marsit.

Në vijim të intervistës ai shpreh bindjen se “në harkun e 5 viteve do të futemi në një kafene si p.sh Starbucks dhe kur të kërkojmë të paguajmë me paratë tradicionale qeveritare, baristi do na qeshë në fytyrë duke na thënë: Çfarë është kjo? Po numëron vërtetë monedhat?”

Ai guxon më tej në intervistë kur thotë se “askush nuk do të përdorë më monedha. E fakti që Draper në intervistën e tij ka përmendur rrjetin e kafeneve Starbucks nuk është i rastësishëm. Në muajt e fundit, drejtori ekzekutiv i grupit të Seattle, Howard Schultz ka lënë të kuptosh se kompania do të verë në shfrytëzim teknologjinë e “blockchain”, rrjetit përmes të cilit funksionojnë kriptovalutat, për një aplikacion për pagesën e klientelës.

Marrë nga Wall Street Italia/ Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.