Serbia forcon angazhimin në sektorin IT – Do të ofrojë program trajnimi për 1 mijë individë
Kryeministrja e Serbisë Ana Brnabic shpalli ditën e enjte vazhdimin e programit të trajnimit për sektorin e Teknologjisë së Informacionit. Duke folur nga ceremonia e përmbylljes së kursit për 100 pjesëmarrës, ajo u shpreh se qeveria konfirmoi me sukses nga faza pilot e këtij programi se tregu kërkon staf IT.
“Duke pasur në mendje se dixhitalizmi dhe mbështetja për sektorin IT është një nga prioritetet kyçe të qeverisë së Serbisë, ne kemi vendosur të vazhdojmë me programin e trajnimit me 900 pjesëmarrës të tjerë. Kjo përmbush edhe premtimin se 1 mijë njerëz do të përfshin në programin e trajnimit këtë vit”, u shpreh Brnabic.
Kryeministrja i nxiti bizneset dhe kompanitë e interesuara të IT, të vazhdojnë të japin mbështetje për këtë trajnim.
“Dixhitalizimi është një mundësi e jashtëzakonshme zhvillimi dhe një shans për Serbinë që të arrijë stadin e një bote të zhvilluar”, tha Brnabic.
Në fazën e parë të programit pati interes nga 9 mijë kandidatë të regjistruar, prej nga ku u përzgjodhën 100 pjesëmarrës. 94 kursantë e përfunduan me sukses kursin dhe shumica prej tyre ose ka marrë oferta pune, ose ka nisur një trajnim tjetër në këtë fushë.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.