SHBA dhe Europa, infeksione rekord – OBSH paralajmëron: Omicron mund të mbingarkojë spitalet

Shtetet e Bashkuara të Amerikës dhe shumë vende europiane kanë raportuar rritje rekord të infektimeve me Covid-19, që kur filloi pandemia, ndërsa varianti omicron po përhapet me shpejtësi. Më shumë se 440,000 raste të reja u regjistruan në Shtetet e Bashkuara të Amerikës, ndërsa Franca, Italia, Greqia, Portugalia dhe Anglia gjithashtu kanë raportuar shifra ditore rekord të infektimeve. Studimet sugjerojnë se varianti omicron është më i lehtë se varianti Delta, por ekziston frika se numri i lartë i infektimeve mund të mbingarkojë spitalet. Organizata Botërore e Shëndetësisë ka paralajmëruar se rreziku nga omicron është shumë i lartë.

Ndërkohë, Polonia të mërkurën regjistroi një rekord prej 794 vdekje të lidhura me Covid-19, numri më i lartë që kur filloi pandemia, ndërsa rreth ¾ e viktimave ishin të pavaksinuar. Qendra për Kontrollin dhe Parandalimin e Sëmundjeve në SHBA raportoi se mesatarja 7-ditore e infektimeve është më e larta që nga janari i këtij viti. Gjithsesi, një zëdhënës i agjencisë deklaroi se të dhënat e infektimeve mund të jenë ftyra për shkak të mbylljes së qendrave të testimit gjatë periudhës së Krishtlindjes, ndërsa shifrat do të stablilizohen pas vitit të ri.

Njëkohësisht, Qenda për Kontrollin e Sëmundjeve ka zgjeruar paralajmërimet për udhëtarët në disa pjesë të Europës, duke shtuar në listë Maltën, Moldavinë dhe Suedinë, vende ku udhëtimi përbën rrezik shumë të lartë të infektimit. Sipas një raporti të publikuar nga Organizata Botërore e Shëndetësisë, infektimet e reja me të gjitha variantet e Covid-19 u rritën me 57% në Europë, krahasuar me javën që u mbyll më 26 dhjetor dhe me 30% në Amerikë.

Të martën, vetëm Franca raportoi mbi 179 mijë raste të reja me koronavirus, shifra më e lartë në Europë, ndërsa edhe vende të tjera po raportojnë tendencë në rritje të infektimeve. Italia regjistroi 78,000 raste të reja dhe 202 viktima, Portugalia regjistroi 17,172 raste dhe Greqia raportoi 21,657 raste.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.