Skemë e re për refugjatët – “KE”, 209 mln euro për ata që kanë ngecur në Greqi

Komisioni Evropian i ka ofruar Greqisë 209 milionë euro si ndihmë shtesë për të përballuar krizën e refugjatëve. Këto para do të jepen nëpërmjet një skeme të re. Janë rreth 62 mijë refugjatë, kryesisht sirianë, afganë dhe irakianë që praktikisht kanë ngecur në Greqi, pasi vendet evropiane mbyllën kufijtë.

Këta refugjatë nuk kishin destinacion Greqinë. 209 milionë eurot shtesë do të shkojnë pikërisht për këta, duke iu ofruar para për të marrë banesa me qira dhe një kartë me para cash nëpërmjet së cilës do të paguajnë mallrat dhe shërbimet bazë. Pjesa dërrmuese e tyre, aktualisht jetojnë nëpër kampe të mbipopulluar. Skema është bërë në bashkëpunim me UNHCR, që është agjencia për refugjatët e Organizatës  së Kombeve të Bashkuara.

Kjo skemë parashikon që me këto para të paguhen 24 mijë qira banesash. Kjo do të rriste numrin e refugjatëve që jetojnë nëpër shtëpi me qira me 30 mijë individë brenda këtij viti, deklaron Komisioni Europian. Ndër të tjera, institucioni deklaroi se, kjo skemë e re është tërësisht inovative në mënyrën se si shpërndahet ndihma.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.