Tarifat e autostradave, ja si funksionojnë në Europë – Falas në Gjermani dhe Suedi. Në Francë koncesioni online

Teksa në Shqipëri pritet të nisë për herë të parë tarifimi për kalimin në një autostradë, atë të Rrugës së Kombit, Europa ka vite që zbaton këtë lloj takse. Sistemi i tarifimit ndryshon sipas vendeve, disa prej të cilave kanë zgjedhur mënyra shumë interesante për ta aplikuar atë.

Austria – I tërë rrjeti i austradave, të financuara me burime publike, menaxhohet nga një shoqëri ku aksionet janë tërësisht të Shtetit. Kjo shoqëri ka detyrën të projektojë, ndërtojë, mirëmbajë, zgjerojë dhe menaxhojë infrastrukturën. Për automjetet deri në 3.5 ton, paguhet me blerjen e një pulle ngjitëse, e cila parashikon kohëzgjatje të ndryshme, me një kosto vjetore deri në 87.3 euro. Ndërsa për mjetet e rënda parashikohet një tarifim në bazë të distancës së përshkuar.

Franca – Tarifimi në Francë, me një rrjet autostradash prej 9100 kilometash, menaxhohet nga 19 koncesionarë privatë. Një metodë e ngjashme ndiqet edhe në Itali, por në Francë gjithçka bëhet publike. Kontrolli dhe mirëmbajtja e koncesioneve rrugore janë në dorë të një drejtorie të përgjithshme të infrastrukturës, e cila çdo vit përgatit një relacion të plotë mbi të ardhurat e koncesionarëve për të qenë sa më transparente. Këto të dhëna janë të aksesueshme online në faqen e ministrisë franceze.

Gjermania – I gjithë rrjeti i autostradave gjermane, me një shtrirje prej 13 mijë kilometrash është financuar nga shteti. Në përgjithësi nuk paguhen tarifa, megjithëse në vitin 2005 është preznatuar një tarifim me një sistem satelitor që gjurmon mjetet e rënda me tonazh mbi 13 ton. Prej vitit 1994 investitorët privatë mund të ndërtojnë dhe menaxhojnë pjesë të veçanta të rrugëve, si ura apo tunele, kundrejt pagesës, megjithëse ky sistem përdoret shumë rrallë.

Britania e Madhe – Deri në vitet ’90, të gjitha veprat rrugore janë realizuar nga shteti. Aksesi në këto autostrada është falas me disa përjashtime. Nga viti 1994 deri në 2013 janë realizuar 13 projekte të financuara nga privati, me një kohëzgjatje maksimale të koncesioneve prej 30 vitesh. Në këto raste, tarifa e koncesionarit lidhet me cilësinë e shërbimit, nivelin e sigurisë dhe trafikun. E vetmja autostradë me tarifë që paguhet në rrugë është “M6 Toll”, pranë qytetit të Birminghan, me një koncesion prej 53 vitesh.

Spanja – Sistemi i tarifave zbatohet aktualisht në 20% të rrjetit të autostradave.Tarifat caktohen nga ministria e Punëve Publike.

Suedia – Planifikimi i investimeve në rrugë i besohet një agjencie shtetërore, por nevojitet miratimi i parlamentit. Agjencia ia beson ndërtimin dhe mirëmbajtjen shoqërive private. Megjithatë, tarifimi parashikohet në raste shumë të pakta. Për pjesën tjetër aksesi është i lirë, ndërsa niveli i tarifave caktohet nga parlamenti.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.