Toyota reagon ndaj Trump: “Tarifat tregojnë se investimet japoneze nuk janë më të mirëpritura”
Prodhuesi japonez i makinave, Toyota, deklaroi se lufta tregtare e presidentit Donald Trump, do të ndikojë negativisht te konsumatorët amerikanë dhe tregon se investimet e kompanisë në SHBA nuk janë më të mirëpritura.
Trump dha një direktivë të re në fund të javës, duke i ofruar 6 muaj kohë Japonisë dhe Bashkimit Europian për të rinegociuar marrëveshjet tregtare me SHBA, në mënyrë që të mbrohen industria automobilistike amerikane, fuqia punëtore dhe inovacioni.
Deklarata e Toyota vjen pasi Shtëpia e Bardhë bëri të ditur se përfaqësuesi i tregtisë në SHBA, Robert Lightthizer, do të trajtojë kërcënimet në siguri kombëtare nga importet e makinave. “Operacionet dhe punëtorët tanë kontribuojnë në mënyrën amerikane të jetesës, ekonominë dhe nuk përbëjnë një kërcënim ndaj sigurisë kombëtare”, deklaroi Toyota.
Komisionerja europiane e tregtisë, Cecilia Malmstrom, kritikoi gjithashtu presidentin amerikan, duke thënë se e refuzon nocionin që eksportet europiane të makinave përbëjnë nëj kërcënim të sigurisë kombëtare.
Toyota bëri të ditur se është “rrënjosur” në Shtetet e Bashkuara për më shumë se 60 vite dhe ka investuar mbi 60 miliardë dollarë në vend, duke punësuar më shumë se 475 mijë amerikanë. Kompania shtoi se kufizimi i importeve të makinave është kundërproduktive në krijimin e vendeve të punës, stimulimin e ekonomisë dhe te zgjedhjet e konsumatorëve.
Toyota bëri të ditur se tarifat do të reduktojnë alternativat për konsumatorët dhe do ndikojnë prodhuesit amerikanë të makinave, pasi shumica e pjesëve që ato përdorin, vijnë nga jashtë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.