“Travellingtoptens”: Shqipëria destinacioni nr 1 që duhet të vizitoni në 2018-ën
Shqipëria vazhdon të njihet e përmendet gjithnjë e më shumë në mediat e huaja për bukuritë e saj natyrore e të renditet ndër destinacionet “must” që duhet vizituar.
Këtë rrallë faqja e specializuar për udhëtimet, Travellingtoptens, e ka cilësuar vendin tonë si destinacionin nr 1 që duhet të vizitoni në 2018-ën.
”Kryeqyteti i vendit, Tirana mund të vizitohet edhe nga Prizreni dhe Prishtina. Mjafton një udhëtim tepër i rekomanduar me autobus. Itinerari i autobusit përshkon disa prej peisazheve më të bukura malore në Europë. Edhe pse mediat perëndimore e kanë përshkruar me emër jo të mirë Shqipërinë, ata që zgjedhin ta vizitojnë do të gjejnë një vend vërtet të mrekullueshëm”, shkruan travelingtoptens.
”Kur të vizitoni kryeqytetin, do të shikoni që Tirana është qytet magjepsës dhe miqësor, por ato që tërheqin më shumë në Shqipëri gjenden në peizazhin e saj malor të veriut, plazhet e mrekullueshëm, numrin e madh të qyteteve dhe kështjellave të lashta”, shkruhet më tej në artikull.
”Nëse jeni adhurues të plazhit, atëherë Vlora është zgjedhja e duhur. Qyteti numëron një numër të shumtë plazhesh të bukura. Pas një dite relaksuese, Vlora ofron edhe një jetë të gjallë nate me shumë bare përgjatë bregdetit. Për udhëtimet gjatë ditës, mund të zgjidhni gjithçka dëshironi. Këtu gjenden mjaft objekte historike, si kalaja më e afërt, ajo e Kaninës e deri te amfiteatrin i Orikumit”.
”Ky vend i hatashëm ka një sërë vendesh historike. Më i njohuri është Apolonia, rrënojat e një qyteti të lashtë grek. Një tjetër vend historik që ia vlen të vizitoni është Kalaja e Rozafës. Ajo ka shërbyer si fortesë për perandoritë osmane, romake dhe serbe në epoka të ndryshme të historisë”, shkruan Travellingtoptens për Shqipërinë.
V.H/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.