Xi, president i “përjetshëm” – Partia Komuniste e Kinës heq limitin e mandatit

Kina ka hequr limitet e mandatit presidencial nga kushtetuta, duke i dhënë presidentit Xi Jinping të drejtën për të qëndruar në pushtet për një periudhë të pacaktuar dhe konfirmuar statusin e tij si lideri më i fuqishëm i vendit që prej Mao Ce Dun.

Partia komuniste në Kinë propozoi amendimin muajin e kaluar dhe që prej atëherë, nuk ka patur dyshime për kalimin në parlament. Vetëm dy ishin kundër nga thuajse 3,000 delegatë.

Limiti deri në 2 mandate 5-vjeçarë ka qenë në kushtetutën e Kinës që prej vitit 1982. Xi Jinping e nisi mandatin e dytë në muajin Tetor dhe në fund të kësaj jave do të caktohet në mënyrë formale nga parlamenti si president i vendit.

Qeveria bëri të ditur se heqja e limitit të mandatit lidhet me mbrojtjen e autoritetit të partisë me Xi Jinping në qendër.  Sipas analistëve,  ky ndryshim në kushtetutën e Kinës mund të ketë ndikime të mëdha në ekonominë e dytë më të madhe në botë, në një kohë të nevojës për reforma të mëdha dhe trajtimit të borxhit gjigant korporativ.

Sipas Bankës së Rregullimeve Ndërkombëtare, borxhi total i Kinës qëndron në më shumë se 250% të Produktit të Brendshëm Bruto.

Xi Jinping dhe zyrtarët e partisë komuniste kanë përmendur trajtimin e rreziqeve në sistemin financiar, por sipas analistëve, Qeveria nuk ka ndërmarrë ende hapa konkretë në uljen e borxhit.

Moody’s dhe S&P irrituan zyrtarët kinezë vitin e kaluar, duke ulur vlerësimin e kreditit dhe paralajmëruar për borxhin.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.