18 mijë shqiptarë të rinj në Gjermani – Hyrjet e reja në 2018, rritja e parë vjetore që prej vitit 2015

Numri i shqiptarëve në Gjermani është rritur për të parën herë që prej vitit 2015, kohën e bumit të azilkërkuesve shqiptarë, thotë të dhënat e sapo publikuara nga zyra federale e statistikave të Gjermanisë, të përpunuara nga `Scan`.

Por, sot situata ndryshon, pasi nuk bëhet fjalë për azilkërkues, por për emigrantë shqiptarë të rregullt, të cilët në pjesën dërrmuese janë të kualifikuar. Kështu, të dhënat tregojnë se, deri më 31 Dhjetor të vitit 2018, në Gjermani ka pasur 55.495 mijë shqiptarë nga rreth 48705 që ishin 365 ditë më parë. Pra, rritja fiksohet në 13.9%. Po të llogarisim që në pjesën dërrmuese bëhet fjalë për njerëz të kualifikuar, të dhënat vijnë në formën e një kambanë alarmi.

Në vitin 2013 në Gjermani kishte vetëm 14 mijë emigrantë shqiptarë. Një e dhënë tjetër që tregon rritjen e ndjeshme të numrit të shqiptarëve gjatë vitit të fundit është ajo që i referohet kohës së qëndrimit të tyre. Janë plot 10 mijë shqiptarët në Gjermani të cilët kanë më pak se 1 vit qëndrim në vend, çka sinjalizon një bum të ri largimi. Të dhënat flasin gjithashtu për rreth 18 mijë shqiptarë që janë shtuar në regjistrin e të huajve në 2018-ën, ndërkohë që rreth 6 mijë janë larguar.

Shifrat tregojnë gjithashtu se, koha mesatare e qëndrimit të shqiptarëve në Gjermani fiksohet në vetëm 5.2 vite, pa diskutim mosha më e re mes vendeve të rajonit, duke qenë se shqiptarët e kanë `zbuluar` Gjermaninë vetëm vitet e fundit. Pjesa dërrmuese e shqiptarëve në Gjermani është e përqendruar në rajonin e Vestfalias, ku gjendet 31% e totalit, thonë të dhënat e Agjencisë Federale të Statistikave në Gjermani.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.