19 Milionë dollarë për të një drekë me Warren Buffett – Ankandi i fundit i këtij lloji i miliarderit merr ofertën rekord!

Një person me fat dhe me gjasë i pasur, ofroi më shumë se 19 milionë dollarë për të ngrënë me Warren Buffett, në herën e 21-të dhe të fundit që biznesmeni miliarder nxorri në ankand një drekë private shuma e të cilës do jetë për një bamirësi në San Francisko.

Oferta fituese në ankandin e eBay që përfundoi të premten mbrëma tejkaloi shumë rekordin e mëparshëm prej 4.57 milionë dollarësh, të paguar në vitin 2019 nga sipërmarrësi i kriptomonedhave Justin Sun, megjithëse identiteti i fituesit të ri nuk mund të përcaktohet menjëherë.

Të ardhurat do shkojnë për Glide, një organizatë jofitimprurëse në distriktin Tenderloin të San Franciskos që ndihmon të varfërit, të pastrehët ose ata që luftojnë abuzimin me substancat. Glide ofron ushqime, strehim, teste për HIV dhe hepatit C, trajnime për punë dhe programe për fëmijë.

Buffett, 91 vjeç, kryetar dhe shefi ekzekutiv i Berkshire Hathaway Inc, ka mbledhur më shumë se 53.2 milionë dollarë për Glide në 21 ankandet, të cilat filluan në vitin 2000. Një zëdhënëse e eBay tha se dreka ishte artikulli më i shtrenjtë i shitur ndonjëherë në faqen e internetit të kompanisë për një bamirësi.

Asnjë ankand nuk u mbajt në 2020 dhe 2021 për shkak të pandemisë COVID-19. Buffett u bë një mbështetës i Glide pasi gruaja e tij e parë Susan, e cila vdiq në 2004, e prezantoi atë me bamirësinë, ku ajo kishte qenë vullnetare.

Ai gjithashtu është zotuar të japë pothuajse të gjithë pasurinë e tij. Buffett kishte pasuri 93.4 miliardë dollarë të premten, duke u renditur i shtati në mbarë botën, sipas revistës Forbes. Fituesi i ankandit të këtij viti dhe deri në shtatë të ftuar do të darkojnë me Buffett në steakhouse Smith & Wollensky në Manhattan.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.