25 prilli, në lupë financat e partive – Strategjia antikorrupsion: 80% e subjekteve parlamentare, kontroll me auditues të jashtëm

Financimet e partive politike do të kalohen në lupë për zgjedhjet e 25 prillit, ndërkohë që një përpjekje e tillë dështoi në masë të konsiderueshme gjatë zgjedhjeve vendore të vitit të shkuara. Scan TV ka zbardhur analizën që i bën Ministria e Drejtësisë auditimit të financave të partive në Analizën e Strategjisë Ndërisntitucionale Antikorrupsion për 6 muajtë e parë të këtij viti, ku theksohet se për vitin 2019 vlera e synuar e treguesit nuk u realizua pasi vetëm financat e 2 partive politike u audituan në përputhje me rekomandiet e projektit ACFA.

Për vitin 2019 vlera e synuar ishte pranimi nga KQZ i 70% e raporteve të auditit të çertifikuara nga auditorë të jashtëm për partitë parlamentare dhe trend rritës për partitë e tjera. Ky tregues performance u realizua në masën 66.6%.

KQZ caktoi 34 ekspertë të cilët monitoruan dhe audituan fondet dhe shpenzimet e fushatës zgjedhore 2019 për 36 parti politike dhe 16 kandidatë të mbështetur nga votuesit. 24 raporte auditimi u çertifikuan dhe publikuan në faqen e internetit të KQZ-së ose 66.6% (përkundrejt synimit 70%). Për vitin 2019 vlera e synuar e treguesit ishte dhënia në masën 25% e sanksioneve mbi numrin total të shkeljeve financiare nga partitë politike të identifikuara. Gjatë këtij viti nuk u dha asnjë sanksion për shkelje të rregulave financiare prej partive politike.

Për të arritur vlerat e këtij treguesi të performancës për vitet 2020-2023 janë parashikuar një seri masash, përmes të cilave të bëhet e mundur pranimi nga KQZ i 80% e raporteve të auditit të çertifikuara nga auditorë të jashtëm për partitë parlamentare dhe trend rritës për partitë e tjera. Për vitin 2022 vlera e synuar është pranimi nga KQZ i 100% e raporteve të auditit të çertifikuara nga auditorë të jashtëm për partitë parlamentare dhe trend rritës për partitë e tjera. Kjo do të bëhet, sipas strategjisë, përmes rritjes së masave ndëshkuese për partitë. Vlera e synuar e këtij treguesi për vitin 2020 është rritja në masën 30% e sanksioneve të dhëna për rastet e identifikuara të shkeljeve financiare nga partitë politike. Për vitin 2021 vlera e synuar është rritja në masën 50% e sanksioneve të dhëna për rastet e identifikuara të shkeljeve financiare nga partitë politike.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.