40 mijë shqiptarë në fondet e investimeve – 2021, AMF: Vlera neto e aseteve 770 milionë dollarë, rritje 15%. 35 milionë dollarë të ardhura
Më shumë se 40 mijë shqiptarë kanë zgjedhur Tregun e Fondeve të Investimeve për të gjeneruar fitime nga kursimet e tyre gjatë vitit 2021, me një rritje prej 26.5% krahasuar me vitin paraardhës. Rritje të dukshme prej rreth 100 milionë dollarësh ka shënuar edhe totali I fondeve të investuara në këtë treg. Të dhënat vijnë përmes Raportit zyrtar të Autoritetit të Mbikëqyrjes Financiare për vitin që sapo lamë pas.
Sipas analizës së të dhënave për tregun e fondeve të investimeve në 31.12.2021, vlera neto e aseteve të Fondeve, arriti rreth 77.69 miliardë lekë, afërisht 770 milionë dollarë, me një rritje prej 10,2 miliardë lekësh ose 15.26%, krahasuar me 31.12.2020.
AMF bën me dije se ky treg dominohet kryesisht nga investimet në Obligacione Qeveritare, të cilat përbëjnë 64.25% të aseteve të fondeve, me një rritje prej 8.15% krahasuar me 31.12.2020.
Ky treg ka gjeneruar gjatë vitit të shkuar një total të ardhurash prej rreth 3.5 miliardë lekësh, afërisht 35 milionë dollarësh. Ndërkohë që kanë qenë të ardhurat nga interesat ato që kanë siguruar edhe pjesën më të madhe të fitimit prej 2.3 miliardë lekësh, afërisht 23 milionë dollarë.
Të ardhurat nga diferenca pozitive e kurseve të këmbimit ka qenë forma tjetër e investimeve që ka gjeneruar të ardhura të konsiderueshme për një total prej 943 milionë lekësh, apo rreth 9 milionë dollarë. Më pak të ardhura ka prodhuar paketa Fitime të realizuara nga shitja e investimeve në letra me vlerë me një total prej 128 milionë lekësh, si dhe të ardhurat nga dividenti, me një total prej rreth 20 milionë lekësh apo afërisht 200 mijë dollarë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.