Apple prezanton iPhone X – Përpiqet të rifitojë udhëheqjen në teknologji me aparatin $999

Gjiganti i teknologjisë Apple prezantoi produktin e shumëpritur iPhone X, aparat që ekzekutivi Tim Cook e quajti “hapin më të madh përpara që prej iPhone-it original”.  Prezantimi pati një serë surprizash, ndërkohë që detajet e publikuar përpara prezantimit mbi celularin e ri dhe produkte të tjera si Apple Watch dolën të sakta.

Megjithatë çmimi prej 999 dollarë dhe dërgesat që nisin në datën 3 Nëntor, sollën skepticizëm te përdoruesit. Investitorët dhe fansat e kanë pritur 10 vjetorin e iPhone me padurim, duke e parë si një mundësi për Apple që të rinovojë linjën e smartphone-it, që ka mbetur prapa konkurrentëve në karakteristikat e reja. Vitin e kaluar, të ardhurat e kompanisë patën rënie kur konsumatorët nuk e pritën mirë iPhone 7, duke thënë se është shumë i ngjashëm me paraardhësin.

Ora e re Apple, për të parën herë, do të mund të bëjë telefonata dhe aksesore internetin pa pasur nevojën që përdoruesi të mbajë një iPhone me vete. iPhone X ofron karikim me wireless dhe një kamera me infrared për njohjen e fytyrës, gjë që zëvendëson sensorin fingerprint për hapjen e celularit. Butoni kryesor është hequr gjithashtu dhe përdoruesit do të duhet të prekin 2 herë ekranin për ta hapur, karakteristikë e ngjashme me aparatët e kompanisë LG.

Apple zakonisht i ka dërguar produktet e reja në 1-2 javë pas lajmërimit. Aksionet e gjigantit të teknologjisë ranë me 0.6% në sesionin tregtar të Shteteve të Bashkuara, pasi u rritën me 1% gjatë eventit. Deri më tani për vitin, vlera në treg e kompanisë është rritur me mbi 40%.

Ekrani i iPhone X ka thuajse të njëjtën madhësi me aparatin iPhone 7 plus, falë heqjes së kontureve, pasi celulari është më i vogël. Ekrani ka ngjyra më të pasura prej teknologjisë OLED të përdorur për herë të parë për iPhone, teknologji që rivali Samsung e ka përdorur prej kohësh.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.